ଶ୍ରୀରାମକୃଷ୍ଣଙ୍କ ଜନ୍ମୋତ୍ସବ ପାଳିତ

ବୋଲଗଡ ବ୍ଲକ୍ ପିଚୁକୁଳି ପଞ୍ଚାୟତ ଅଧୀନସ୍ଥ ଟିକାତାଳ ରାମକୃଷ୍ଣ ସେବାଶ୍ରମରେ ଠାକୁର ଶ୍ରୀରାମକୃଷ୍ଣ ପରମହଂସଙ୍କ ଜନ୍ମ ସପ୍ତାହ ପାଳିତ ହୋଇଯାଇଛି। ଆଶ୍ରମର ଅଧ୍ୟକ୍ଷ ସ୍ବାମୀ ଭାଗବତାନନ୍ଦ ମହାରାଜାଙ୍କ ସ୍ଵହସ୍ତରେ ଫେବୃୟାରୀ ୨୧ ମଙ୍ଗଳବାର ଦିନ ସକାଳେ ଠାକୁରଙ୍କ ଜନ୍ମତିଥି ପୂଜା,ହୋମ,ଆଳତି ଓ ସ୍ବତନ୍ତ୍ର ସଙ୍ଖୁଡି ଭୋଗ ଅର୍ପଣ କରାଯାଇଥିଲା।
ଆଜି ସକାଳ ୧୦ଟାରୁ ଆଶ୍ରମର ସଭାପତି ବାସୁଦେବ ମହାପାତ୍ରଙ୍କ ଅଧ୍ୟକ୍ଷତାରେ ଏକ ଭକ୍ତ ସମ୍ମିଳନୀ ସହିତ ସାଧନା ଶିବିର ଅନୁଷ୍ଠିତ ହୋଇଥିଲା। ସ୍ବାମୀ ଭାଗବତାନନ୍ଦ ପୁରୀ ମହାରାଜ ଉପସ୍ଥିତ ଭକ୍ତମାନଙ୍କୁ ଠାକୁରଙ୍କ ଜୀବନର ସାଧନାର ମହତ୍ତ୍ବ ପ୍ରତିପାଦନ କରିବାକୁ ଯାଇ “ମାନବ ଜୀବନର ଏକମାତ୍ର ଉଦ୍ଦେଶ୍ଯ ଭଗବାନ ଲାଭ” ସମ୍ବନ୍ଧରେ ଆଲୋକପାତ କରିଥିଲେ। ଅବସରପ୍ରାପ୍ତ ସହକାରୀ ବନ ସଂରକ୍ଷକ ପ୍ରସନ୍ନ କୁମାର ବିଶ୍ବାଳ ସମ୍ମାନିତ ଅତିଥି ଭାବରେ ଯୋଗଦେଇ ସେବା, ତ୍ୟାଗ, ସଂଯମ ସହିତ ଆଧ୍ୟାତ୍ମିକ ଜୀବନର ମହତ୍ତ୍ବ ସମ୍ବନ୍ଧରେ ଆଲୋଚନା କରିଥିଲେ। ଡାକ୍ତର ନବକିଶୋର ମହାପାତ୍ର, ଶିକ୍ଷାବିତ୍ ବିଜୟ କୁମାର ମହାପାତ୍ର, ପ୍ରାଧ୍ୟାପକ ସର୍ବେଶ୍ବର ସାହୁ ପ୍ରମୁଖ ଠାକୁରଙ୍କ ଜୀବନରେ ସେ କିପରି ବିଭିନ୍ନ ଧର୍ମରେ ସାଧନାକରି ଏକ ଈଶ୍ବର ଲକ୍ଷ୍ୟରେ ଉପନୀତ ହୋଇଥିଲେ ; ଯେଉଁଥିପାଇଁ ସ୍ବାମୀ ବିବେକାନନ୍ଦ ତାଙ୍କୁ ଅବତାର ବରିଷ୍ଠ ବୋଲି ପ୍ରମାଣିତ କରିଥିଲେ ; ସେ ସମ୍ବନ୍ଧରେ ମାର୍ମିକ ଆଲୋଚନା କରିଥିଲେ।
ସ୍ଵାମୀ ଗଣେଶାନନ୍ଦ ଓ ମନୋଜ କୁମାର ଗୁମାନସିଂହ ଭକ୍ତି ସଙ୍ଗୀତ ଗାନ କରିବା ସହ କୀର୍ତ୍ତନ ପରିବେଷଣ କରିଥିଲେ। ରାଜକିଶୋର ଛୁଆଳସିଂହ ଉପସ୍ଥିତ ଶ୍ରଦ୍ଧାଳୁ ମାନଙ୍କୁ “ଅଷ୍ଟୋତ୍ତର ଶତନାମ” ମନ୍ତ୍ରୋଚ୍ଚାରଣ କରାଇଥିଲେ। ବରିଷ୍ଠ ସଦସ୍ଯ ପଦ୍ମଚରଣ ବିଶ୍ଵାଳ ଧନ୍ୟବାଦ ଅର୍ପଣ କରିଥିଲେ।