ରାଜଧାନୀ ମହାବିଦ୍ୟାଳୟରେ ‘ବିଶ୍ଵ ସଂସ୍କୃତ ଦିବସ-ମହୋତ୍ସବ’ ପାଳିତ

ଭୁବନେଶ୍ଵର: ରାଜଧାନୀ ମହାବିଦ୍ୟାଳୟର ସ୍ନାତକୋତ୍ତର-ସଂସ୍କୃତବିଭାଗ ପକ୍ଷରୁ “ବିଶ୍ଵ ସଂସ୍କୃତ ଦିବସ ମହୋତ୍ସବ- ୨୦୨୪” ଉପଲକ୍ଷେ ଏକଦିବସୀୟ ରାଷ୍ଟ୍ରୀୟ ସଂଗୋଷ୍ଠୀ ଅନୁଷ୍ଠିତ ହୋଇଯାଇଛି | କାର୍ଯ୍ୟକ୍ରମର ଆରମ୍ଭରେ ଅତିଥିମାନଙ୍କ ଦ୍ଵାରା ଦୀପପ୍ରଜ୍ଜ୍ଵଳନ ସହିତ ବୈଦିକ ମଙ୍ଗଳାଚରଣ ଗାନ କରାଯାଇଥିଲା | ଏହା ପରେ ସମସ୍ତ ନିମନ୍ତ୍ରିତ ଅତିଥିମାନଙ୍କୁ ପୁଷ୍ପଗୁଚ୍ଛ, ଉପଢୌକନ ଏବଂ ଉତ୍ତରୀୟ ପ୍ରଦାନପୂର୍ବକ ସମ୍ମାନିତ କରାଯାଇଥିଲା | 

ତା’ପରେ ବିଭାଗୀୟ ଛାତ୍ର-ଛାତ୍ରୀମାନେ ସ୍ଵାଗତ-ଗୀତ ଏବଂ ନୃତ୍ୟ ପରିବେଷଣ କରିଥିଲେ | ‘ନୂତନ ଶିକ୍ଷାନୀତିରେ ସଂସ୍କୃତର ଭୂମିକା’ ବିଷୟରେ ନିମନ୍ତ୍ରିତ ଅତିଥିବୃନ୍ଦ ସ୍ଵକୀୟ ଅଭିଭାଷଣ ପ୍ରଦାନ କରିଥିଲେ | ମହାବିଦ୍ୟାଳୟର ଅଧ୍ୟକ୍ଷା ପ୍ର. ଶ୍ରୀମତୀ ମିନତି ମିଶ୍ରଙ୍କ ସଭାପତିତ୍ଵରେ ଏହି କାର୍ଯ୍ୟକ୍ରମ ପରିଚାଳିତ ହୋଇଥିଲା | ମାନବୀୟ ମୂଲ୍ୟବୋଧର ବିକାଶ ପାଇଁ ତଥା ସମାଜକୁ ଶୃଙ୍ଖଳିତ, ସୁବ୍ୟବସ୍ଥିତ ଓ ସୁସଂସ୍କୃତ କରିବା ନିମନ୍ତେ ସଂସ୍କୃତଜ୍ଞାନର ନିତାନ୍ତ ଆବଶ୍ୟକତା ରହିଛି ବୋଲି ସେ ଉଦବୋଧନ ଦେଇଥିଲେ |