ଶିକ୍ଷକ ନିଯୁକ୍ତି ମାମଲା: ହାଇକୋର୍ଟଙ୍କ ଆଦେଶ ଉପରେ ସୁପ୍ରିମକୋର୍ଟଙ୍କ ରୋକ

ନୂଆଦିଲ୍ଲୀ: ସୁପ୍ରିମକୋର୍ଟ ଆହ୍ଲାବାଦ ହାଇକୋର୍ଟଙ୍କ ଆଦେଶ ଉପରେ ରୋକ ଲଗାଇଛନ୍ତି। ଯେଉଁଥିରେ ହାଇକୋର୍ଟ ଉତ୍ତରପ୍ରଦେଶ ସରକାରଙ୍କୁ ୬୯ ହଜାର ସହାୟକ ଶିକ୍ଷକଙ୍କ ଏକ ନୂତନ ତାଲିକା ପ୍ରସ୍ତୁତ କରିବାକୁ କହିଥିଲେ। 

ଏହା ସହିତ ଜୁନ୍ ୨୦୨୦ଏବଂ ଜାନୁଆରୀ ୨୦୨୨ରେ ପ୍ରକାଶିତ ଉତ୍ତରପ୍ରଦେଶର ଶିକ୍ଷକ ଚୟନ ତାଲିକା ବାତିଲ କରିବାକୁ ସୁପ୍ରିମକୋର୍ଟ ମଧ୍ୟ ହାଇକୋର୍ଟଙ୍କ ନିର୍ଦ୍ଦେଶ ଉପରେ ରୋକ ଲଗାଇଛନ୍ତି।  ଏଥିରେ ୬,୮୦୦ ପ୍ରାର୍ଥୀ ସାମିଲ ହୋଇଥିଲେ। ଏହି ମାମଲାରେ ସୁପ୍ରିମକୋର୍ଟ ଉତ୍ତରପ୍ରଦେଶ ସରକାର ଏବଂ ଅନ୍ୟମାନଙ୍କୁ ନୋଟିସ ଜାରି କରିଛନ୍ତି ଏବଂ ଏହା ସହିତ ଅନ୍ତିମ ଶୁଣାଣି ମଧ୍ୟ କରାଯିବ ବୋଲି କହିଛନ୍ତି।

ସୂଚନାଯୋଗ୍ୟ, ୨୦୧୯ରେ ୬୯ହଜାର ସହାୟକ ଶିକ୍ଷକ ନିଯୁକ୍ତି ପାଇଁ ମନୋନୀତ ପ୍ରାର୍ଥୀଙ୍କ ତାଲିକାକୁ ପୁନର୍ବାର ପ୍ରକାଶ କରିବାକୁ ଆହ୍ଲାବାଦ ହାଇକୋର୍ଟ ନିର୍ଦ୍ଦେଶ ଦେଇଥିଲେ। ୧ ଜୁନ୍ ୨୦୨୦ ଏବଂ ୫ ଜାନୁୟାରୀ ୨୦୨୨ର ଚୟନ ତାଲିକାକୁ ଅଗ୍ରାହ୍ୟ କରି ନିୟମ ଅନୁଯାୟୀ ତିନିମାସ ମଧ୍ୟରେ ଏକ ନୂତନ ଚୟନ ତାଲିକା ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଥିଲେ। କୋର୍ଟଙ୍କ ଏହି ନିଷ୍ପତ୍ତି ରାଜ୍ୟ ସରକାରଙ୍କ ପାଇଁ ଏକ ବଡ଼ ଝଟକା ବୋଲି ବିବେଚନା କରାଯାଇଥିଲା। ଏଥି ସହିତ ପୂର୍ବ ତାଲିକା ଆଧାରରେ କାର୍ଯ୍ୟ କରୁଥିବା ଶିକ୍ଷକଙ୍କ କାର୍ଯ୍ୟ କରିବା ନେଇ ସଙ୍କଟ ଦେଖାଦେଇଥିଲା।