ନକଲି ମୋବିଲ୍ କାରଖାନା ଠାବ: ଇଞ୍ଜିନ୍ ଅଏଲ୍, ଲେବୁଲ୍, ବୋତଲ ଜବତ
ରାଉରକେଲା: ନାଲାରୋଡ୍ ରାଜା ଷ୍ଟ୍ରିଟ୍ରୁ ପୁଣି ନକଲି ମୋବିଲ୍(ଇଞ୍ଜିନ ଅଏଲ) କାରଖାନା ଠାବ ହୋଇଛି। ପ୍ଲାଣ୍ଟସାଇଟ୍ ପୁଲିସ କାରଖାନାରେ ଚଢ଼ଉକରି ବିପୁଳ ପରିମାଣର ଖାଲି ବୋତଲ, ଠିପି, ବାର୍କୋଡ୍, ନାମୀଦାମୀ କମ୍ପାନୀର ଲେବୁଲ୍, ନକଲି ଅଏଲ୍ ଜାର୍ ଆଦି ଜବତ କରିଛି।
ଚଢ଼ଉ ପରେ କାରଖାନା ମାଲିକ ଘଟଣାସ୍ଥଳରୁ ଫେରାର ହୋଇଯାଇଛି। ଘଟଣାସ୍ଥଳରୁ ଲକ୍ଷାଧିକ ଟଙ୍କାର ସାମଗ୍ରୀ ଜବତ ହୋଇଥିବା ଜଣାପଡ଼ିଛି। କେତେଦିନ ଧରି ନକଲି କାରଖାନା ଚାଲୁଥିଲା? କେଉଁକେଉଁ ଅଞ୍ଚଳକୁ ଏସବୁ ନକଲି ସାମଗ୍ରୀ ଚାଲାଣ ହେଉଥିଲା? ଏହି କାରବାରରେ କେତେ ଜଣଙ୍କର ସମ୍ପୃକ୍ତି ରହିଛି ଆଦି ବିଷୟରେ ପୁଲିସ ତଦନ୍ତ ଚଳାଇଛି।
ସୂଚନାଯୋଗ୍ୟ ଯେ, ୨୦୨୩ ମାର୍ଚ୍ଚ ୨୦ରେ ଏହି ଜାଗାରୁ ନକଲି ମୋବିଲ୍ କାରଖାନା ଠାବ ହୋଇଥିଲା। ମାଲିକ ତସ୍ଲିମ୍ ଆରିଫକୁ ପୁଲିସ ଗିରଫକରି କୋର୍ଟଚାଲାଣ କରିଥିଲା।