ଗୋଆରେ ବୁଡ଼ିଲା ଯାତ୍ରୀବାହୀ ଡଙ୍ଗା, ଜଣେ ମୃତ

ଗୋଆ: ବୁଡ଼ିଲା ପର୍ଯ୍ୟଟକଙ୍କୁ ନେଇ ଯାଉଥିବା ଏକ ଡଙ୍ଗା | ଉତ୍ତର ଗୋଆର କାଲାଙ୍ଗୁଟ୍ ସମୁଦ୍ରରେ ଡଙ୍ଗା ବୁଡିଥିବା ଜଣାଯାଇଛି | ଏହି ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଛି। ଡଙ୍ଗାରେ ଥିବା ୨୦ ଜଣଙ୍କୁ ସୁରକ୍ଷିତ ଉଦ୍ଧାର କରାଯାଇଛି | ବୁଧବାର ଦିନ ପ୍ରାୟ ୧.୩୦ ସମୟରେ ଏହି ଘଟଣା ଘଟିଥିଲା ବୋଲି ଜଣାଯାଇଛି ।

ପୁଲିସର ସୂଚନା ମୁତାବକ, ଡଙ୍ଗାର ଇଂଜିନ ଖରାପ ହେବାରୁ ଏହି ଦୁର୍ଘଟଣା ଘଟିଥିଲା | ଏହାଦ୍ୱାରା ଯାତ୍ରୀ ସବୁ ପାଣିକୁ ଖସିପଡିଥିଲେ | ଏହି ଦୁର୍ଘଟଣାରେ ୫୪ବର୍ଷୀୟ ବ୍ୟକ୍ତିଙ୍କ ମୃତ୍ୟୁ ହୋଇଛି | ଡଙ୍ଗାରେ ୨ଜଣଙ୍କୁ ଛାଡି ଅନ୍ୟ ସମସ୍ତେ ଲାଇଫ ଜ୍ୟାକେଟ ପିନ୍ଧିଥିବାରୁ ଜୀବନ ବଞ୍ଚିଯାଇଛି | ଦୁର୍ଘଟଣା ପରେ ସୁରକ୍ଷିତ ଉଦ୍ଧାର ହୋଇଥିବା ଯାତ୍ରୀଙ୍କର ଏବେ ଚିକିତ୍ସା ଚାଲିଛି ବୋଲି କହିଛି ପୁଲିସ | ଘଟଣାଟି ସମୁଦ୍ର କୂଳରୁ ୬୦ମିଟର ଦୂରରେ ଘଟିଥିବା ଜଣାଯାଇଛି |

ଏହା ପୂର୍ବରୁ ମୁମ୍ବାଇରେ ଏକ ଡଙ୍ଗା ଦୁର୍ଘଟଣାଗ୍ରସ୍ତ ହୋଇଥିଲା, ଯାହାଦ୍ୱାରା ୧୫ଜଣଙ୍କ ମୃତ୍ୟୁ ହୋଇଥିଲା | ୧୦୦ରୁ ଅଧିକ ଯାତ୍ରୀଙ୍କୁ ନେଇ ଯାଉଥିବା ଡଙ୍ଗା ଗେଟୱେ ଅଫ୍ ଇଣ୍ଡିଆରୁ ଏଲିଫାଣ୍ଟା ଦ୍ୱୀପକୁ ଯାଉଥିଲା | ଏହି ସମୟରେ ନୌସେନାର ଏକ ସ୍ପିଡ ବୋଟ ଯାତ୍ରୀଙ୍କୁ ନେଇ ଯାଉଥିବା ଡଙ୍ଗାକୁ ଧକ୍କା ଦେଇଥିଲା |