ରାସନ୍କାର୍ଡ ନେଇ ଚେତାବନୀ ଦେଲେ ମନ୍ତ୍ରୀ, ଧରାପଡ଼ିଲେ କାର୍ଯ୍ୟାନୁଷ୍ଠାନ ନେବେ
ଭୁବନେଶ୍ବର: ସରକାରୀ ଚାକିରିଆଙ୍କୁ ଏବେ ରାସନ୍କାର୍ଡ ଭୟ। ପ୍ରତିମାସ ୫ କିଲୋ ଲେଖାଏଁ ମାଗଣାରେ ନେଉଥିବା ଚାଉଳ ଆଉ ନେଇ ପାରିବେ ନାହିଁ। ଧରାପଡ଼ିଗଲେ ଅସୁବିଧାରେ ପଡ଼ିଯିବାର ଭୟ ରହୁଛି। ସେଥି ପାଇଁ ମାତ୍ର ତିନିଦିନରେ ୨୦ ହଜାର ସରକାରୀ ଚାକିରିଆ ରାସନ୍କାର୍ଡ ଫେରାଇସାରିଛନ୍ତି। ରାସନ୍କାର୍ଡ ନେଇ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର କହିଛନ୍ତି, ଭଲ ଚାକିରି ବା ଭଲ ଦରମା ପାଉଥିବା କର୍ମଚାରୀ ରାସନ୍କାର୍ଡ ଫେରାଇ ଦିଅନ୍ତୁ। ଦୁଇ ଦିନ ତଳେ ୧୨ ହଜାର ସରକାରୀ ଚାକିରିଆ ରାସନ୍କାର୍ଡ ଫେରାଇ ଦେଇଥିବା ଜଣାପଡ଼ିଥିଲା। ଆଜି ଏହି ସଂଖ୍ୟା ୨୦ ହଜାରରେ ପହଞ୍ଚିଛି। ଠିକା ଭିତ୍ତିକ ଚାକିରି କରୁଥିବା ଲୋକ ଯଦି ୧୧ରୁ ୧୨ ହଜାର ଟଙ୍କା ଦରମା ପାଉଥିବା ସରକାରୀ ଚାକିରିଆଙ୍କ ପାଇଁ କୌଣସି ଅସୁବିଧା ନାହିଁ। ଏହି ବର୍ଗର ଦରମା ପାଉଥିଲେ ରାସନ୍କାର୍ଡ କଟିବ ନାହିଁ। ସେମାନେ ରାସନ କାର୍ଡ ଫେରେଇବା ଆବଶ୍ୟକ ନାହିଁ। ସ୍ୱଳ୍ପ ବେତନଭୋଗୀ କମ ଦରମା ପାଉଥିଲେ କାର୍ଡ ଫେରେଇବା ଆବଶ୍ୟକ ନାହିଁ।