ଟ୍ରମ୍ପଙ୍କ ବର୍ତ୍ତମାନର ଯୁଦ୍ଧବିରତି ପ୍ରସ୍ତାବକୁ ଗ୍ରହଣ କରିବା ସମ୍ଭବ ନୁହେଁ : ରୁଷ

ମସ୍କୋ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଦିଆଯାଇଥିବା ଯୁଦ୍ଧବିରତି ପ୍ରସ୍ତାବକୁ ଗମ୍ଭୀରତାର ସହ ବିଚାର କରାଯାଉଛି, କିନ୍ତୁ ରୁଷ ଏହାର ବର୍ତ୍ତମାନର ଡ୍ରାଫ୍ଟ ରୂପରେ ଏହାକୁ ଗ୍ରହଣ କରିପାରିବ ନାହିଁ ବୋଲି ରୁଷ କହିଛି। ଡେଲି ମେଲର ଏକ ରିପୋର୍ଟ ଅନୁଯାୟୀ, ମସ୍କୋ ମଧ୍ୟ କିଛି ନୂତନ ଦାବି ଜାରି କରିଛି। ଏହି ଗଣମାଧ୍ୟମ ରିପୋର୍ଟରେ ରୁଷ ସରକାରୀ ଗଣମାଧ୍ୟମ ପ୍ରତିଷ୍ଠାନଗୁଡ଼ିକୁ ଉଦ୍ଧୃତ କରାଯାଇଛି। ରୁଷର ଉପ-ବୈଦେଶିକ ମନ୍ତ୍ରୀ ସେରଗେଇ ରିଆବକୋଭ କହିଛନ୍ତି ଯେ ‘ଆମେରିକୀୟମାନଙ୍କ ଦ୍ୱାରା ପ୍ରଦାନ କରାଯାଇଥିବା ମଡେଲ ଏବଂ ସମାଧାନକୁ ଆମେ ବହୁତ ଗମ୍ଭୀରତାର ସହ ନେଉଛୁ।’ କିନ୍ତୁ ଆମେ ଏହାକୁ ବର୍ତ୍ତମାନର ରୂପରେ ଗ୍ରହଣ କରିପାରିବୁ ନାହିଁ।

ରୁଷର ଉପ-ବୈଦେଶିକ ମନ୍ତ୍ରୀ ସେରଗେଇ ରିଆବକୋଭ ଇଣ୍ଟରନ୍ୟାସନାଲ ଆଫେୟାର୍ସକୁ ଦେଇଥିବା ଏକ ସାକ୍ଷାତକାରରେ କହିଛନ୍ତି ଯେ ‘ଯେପର୍ଯ୍ୟନ୍ତ ଆମେ ଦେଖିପାରୁଛୁ, ଆଜି ଆମର ମୁଖ୍ୟ ଦାବି ପାଇଁ ସେମାନଙ୍କ ମଧ୍ୟରେ କୌଣସି ସ୍ଥାନ ନାହିଁ।’ ଏହି ସଂଘର୍ଷର ମୂଳ କାରଣ ସହ ଜଡିତ ସମସ୍ୟାଗୁଡ଼ିକର ସମାଧାନ ହେବାକୁ ବାକି ଅଛି। ଯାହା ବର୍ତ୍ତମାନର ଡ୍ରାଫ୍ଟରେ ସମ୍ପୂର୍ଣ୍ଣ ଅନୁପସ୍ଥିତ। ଏହି ପ୍ରସ୍ତାବର ତ୍ରୁଟିଗୁଡ଼ିକୁ ଦୂର କରିବାକୁ ପଡିବ।

ଉଲ୍ଲେଖନୀୟ ଯେ ରବିବାର ଦିନ ହିଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଏବଂ ୟୁକ୍ରେନୀୟ ରାଷ୍ଟ୍ରପତି ଭୋଲୋଡିମିର ଜେଲେନ୍ସକି ଉଭୟଙ୍କୁ ସମାଲୋଚନା କରିଥିଲେ। ୟୁକ୍ରେନରେ ଚାଲିଥିବା ଯୁଦ୍ଧ ଉପରେ ଟ୍ରମ୍ପ ନିଜର ହତାଶା ପ୍ରକାଶ କରିଥିଲେ, ଯାହାକୁ ସେ ଶୀଘ୍ର ସମାପ୍ତ କରିବାକୁ ପ୍ରତିଶ୍ରୁତି ଦେଇଥିଲେ। ସେ ଦାବି କରିଥିଲେ ଯେ ଆଲୋଚନାରେ ଅଗ୍ରଗତି ହେଉଛି କିନ୍ତୁ ଚେତାବନୀ ଦେଇଥିଲେ ଯେ ମସ୍କୋ ଉପରେ ଚାପ ପକାଇବା ପାଇଁ ସେ ଅତିରିକ୍ତ କଟକଣା ଲଗାଇପାରନ୍ତି।