କେଦାରନାଥ ଯାତ୍ରା ପୂର୍ବରୁ ସଂକ୍ରମିତ ହେଲେ ୧୨ ଖଚ୍ଚର, ଭୟଭୀତ ଯାତ୍ରୀ

ଡେରାଡୁନ: କେଦାରନାଥ ଯାତ୍ରା ପୂର୍ବରୁ ସଂକ୍ରମିତ ହେଲେ ଘୋଡ଼ା । ଦେବଭୂମି କୁହାଯାଉଥିବା ଉତ୍ତରାଖଣ୍ଡର ରୁଦ୍ରପ୍ରୟାଗ ଜିଲ୍ଲାରେ କେଦାରନାଥଧାମ ଯାତ୍ରା ପୂର୍ବରୁ ୧୨ଟି ଖଚ୍ଚର (ଘୋଡ଼ା) ଠାରେ H3N8 ଇନଫ୍ଲୁଏଞ୍ଜା ଭାଇରସ୍ ମିଳିଛି । 

ତେବେ ଏହି ଭୂତାଣୁର ସୂଚନା ସେତେବେଳେ ଜଣାପଡିଲା ଯେତେବେଳେ ଖଚ୍ଚରଙ୍କୁ ମେଡିକାଲ୍ ଯାଞ୍ଚ୍ ପାଇଁ ନିଆଗଲା । ଡାକ୍ତରୀ ପରୀକ୍ଷା ପାଇଁ ୩୦୦ ଖଚ୍ଚରଙ୍କ ନମୂନା ନିଆଯାଇଥିଲା । ମାତ୍ର ଘୋଡାଙ୍କ ଦେହରେ ଭୂତାଣୁର ଖବର ମିଳିବା ପରେ ଏବେ ଖଚ୍ଚରଙ୍କୁ କ୍ବାରେଣ୍ଟିନରେ ରଖାଯାଇଛି । ଭୂତାଣୁ ଯେମିତି ଆଗକୁ ନ ବ୍ୟାପିବ ସେଥିପାଇଁ ସ୍ବାସ୍ଥ୍ୟ ବିଭାଗ ଏବଂ ପ୍ରଶାସନ ଏହି ସ୍ଥିତି ଉପରେ ନଜର ରଖିଛି । 

ଆପଣଙ୍କ ଜାଣିଲେ ଆଶ୍ଚର୍ଯ୍ଯ ହେଲେ ପ୍ରତିବର୍ଷ ପାଖାପାଖି ୨୦ ହଜାର ଖଚ୍ଚର କେଦାରନାଥ ଯାତ୍ରା ସମୟରେ ଯାତ୍ରୀଙ୍କୁ ନେବା ଆଣିବା କରନ୍ତି । ଚଳିତବର୍ଷ ଯାତ୍ରା ଆରମ୍ଭ ହେବା ପୂର୍ବରୁ ପ୍ରଶାସନ ସବୁ ଖଚ୍ଚର ଏବଂ ତାଙ୍କ ମାଲିକଙ୍କ ପଞ୍ଜୀକରଣ ଏବଂ ମେଡିକାଲ୍ ଯାଞ୍ଚର ପ୍ରକ୍ରିୟା ଆରମ୍ଭ କରିସାରିଛି । ଆଉ ଏହି ଯାଞ୍ଚ୍ ସମୟରେ ୧୨ଟି ଖଚ୍ଚର ସଂକ୍ରମିତ ହୋଇଥିବା ଜଣାପଡିଛି ।

ସେପଟେ କେଦାରନାଥ ଯାତ୍ରାରେ ହଜାର ହଜାର ଶ୍ରଦ୍ଧାଳୁ ସାମିଲ୍ ହେଉଛନ୍ତି । ସେଥିପାଇଁ ପ୍ରଶାସନ ମଧ୍ୟ ସତର୍କତା ଅବଲମ୍ବନ କରୁଛି । ପ୍ରଶାସନର କଡ଼ା ନିର୍ଦ୍ଦେଶ ରହିଛି ଯେ ସଂକ୍ରମିତ ଖଚ୍ଚର ଯାତ୍ରାରେ ଆଦୌ ସାମିଲ୍ ହୋଇପାରିବେ ନାହିଁ । ଯଦି ନିର୍ଦ୍ଦେଶର ପାଳନ ନ କରାଯାଏ କଠୋର କାର୍ଯ୍ୟାନୁଷ୍ଠାନ ନିଆଯିବ ।