ମାଓମୁକ୍ତ ଭାରତ’ର ସ୍ବପ୍ନକୁ ବଳ ଦେଉଛି ଡବଲ ଇଞ୍ଜିନ ସରକାର, ଶାହାଙ୍କ ଦମ୍ଭୋକ୍ତିକୁ ଆହୁରି ଶକ୍ତ କଲେ ଛତିଶଗଡ଼ ମୁଖ୍ୟମନ୍ତ୍ରୀ

ରାଇପୁର: ଛତିଶଗଡରେ ସମାଧି ନେବ ନକ୍ସଲବାଦ । ଭାରତ ହେବ ନକ୍ସଲ ମୁକ୍ତ । ୨୦୨୬ ମାର୍ଚ୍ଚ ୩୧ ସୁଦ୍ଧା ଭାରତକୁ ନକ୍ସଲ ମୁକ୍ତ କରିବାକୁ ମୋଦୀ ସରକାର ଏବଂ ଅମିତ ଶାହା ଯେଉଁ ସ୍ବପ୍ନ ଦେଖିଛନ୍ତି ତାହା ଖୁବଶୀଘ୍ର ସତ ହେବାକୁ ଯାଉଛି । ଡବଲ ଇଞ୍ଜିନର ସରକାର ଥିବାରୁ ନକ୍ସଲ ମୁକ୍ତ ଛତିଶଗଡ ସହ ମାଓମୁକ୍ତ ଭାରତ ଗଢିବାକୁ ଆଶାବାଦୀ ଅଛନ୍ତି ଛତିଶଗଡ ମୁଖ୍ୟମନ୍ତ୍ରୀ ବିଷ୍ଣୁଦେଓ ସାଏ ।

ଛତିଶଗଡ଼ ଦାନ୍ତେୱାଡ଼ାରେ ଆୟୋଜିତ ‘ବସ୍ତର ପଣ୍ଡୁମ୍’ କାର୍ଯ୍ୟକ୍ରମରେ ଯୋଗ ଦେଇ ବସ୍ତରର ଯୁବକଙ୍କ ପ୍ରଶଂସା କରିଛନ୍ତି ମୁଖ୍ୟମନ୍ତ୍ରୀ । କହିଛନ୍ତି ବସ୍ତର ଯୁବପିଢି ଏବେ ବିକାଶର ଭାଗିଦାରୀ ହେଉଛନ୍ତି । ପୂର୍ବରୁ ଯେଉଁଠି ଗୁଳିର ଗର୍ଜନ ଶୁଭୁଥିଲା ଆଜି ସେଠୁ ସ୍କୁଲ ଘଣ୍ଟିର ଶବ୍ଦ ଶୁଭୁଛି… ତେଣୁ ବିକାଶ ବହୁ ଦୂର ନୁହେଁ । ଡବଲ ଇଞ୍ଜିନ ସରକାର ମାଓ ମୁକ୍ତ ବସ୍ତର ଗଢି ବିକାଶର ଚିତ୍ର ଆଙ୍କିବେ ।

ସେପଟେ ଶାହା ବି ନକ୍ସଲଙ୍କୁ ଅସ୍ତ୍ର ଛାଡି ଆତ୍ମସମର୍ପଣ କରିବାକୁ ଆହ୍ୱାନ ଦେଇଛନ୍ତି, ହିଂସ୍ରତାର ରାସ୍ତାରେ ନୁହେଁ ବରଂ ସମାଜର ମୁଖ୍ୟସ୍ରୋତରେ ସାମିଲ ହେବାକୁ ଅନୁରୋଧ କରିଛନ୍ତି । ନକ୍ସଲଙ୍କୁ ଭାଇ କହି ସମ୍ବୋଧନ କରିବା ସହ ନିବେଦନ ସ୍ବରରେ ଶାହା କହିଛନ୍ତି, କେହି ଜଣେ ବି ନକ୍ସଲ ଯେତେବେଳେ ଟଳିପଡେ ବା ତାକୁ ହତ୍ୟା କରାଯାଏ ସେତେବେଳେ ମତେ ଭାରି କଷ୍ଟ ହୁଏ । ପ୍ରଧାନମନ୍ତ୍ରୀ ମୋଦୀ ଚାହାଁନ୍ତି ବସ୍ତରର ବିକାଶ ହେଉେ ଆଉ ତାହା ସେତେବେଳେ ସମ୍ଭବ ହେବ ଯେତେବେଳେ ତୁମେମାନେ ହିଂସାର ପଥ ଛାଡି ଶାନ୍ତିର ପଥ ଗ୍ରହଣ କରିବ। 

ଆମେ ଚାହୁଁ ପ୍ରତି ଗାଁରେ ଡାକ୍ତରଖାନା, ପ୍ରତି ଗାଁରେ ସ୍କୁଲ, ପ୍ରତି ଘରେ ୭ କିଲୋ ଚାଉଳ, ଆଧାର କାର୍ଡ, ରେସନ କାର୍ଡ, ସ୍ୱାସ୍ଥ୍ୟ ବୀମା ରହୁ । ହେଲେ ଏହା ସେତେବେଳେ ହିଁ ସତ ହୋଇପାରେ ଯେତେବେଳେ ବସ୍ତରର ଯୁବକମାନେ ଭାବିବେ ଯେ ବସ୍ତର ନକ୍ସଲ ମୁକ୍ତ ହେବା ଉଚିତ୍ ବୋଲି । ଏମିତି କହି ନକ୍ସଲମାନଙ୍କୁ ନିବେଦନ ଠାଣୀରେ ନକ୍ସଲବାଦର ଅନ୍ତ ପାଇଁ ଅନୁରୋଧ କରିଛନ୍ତି ଶାହା ।