ଏନଆଇଏ ମୁଖ୍ୟାଳୟରେ ବନ୍ଦୀ ଥିବା ତହବୁର ମଗାଇଲେ କୁରାନ, କଲମ ଏବଂ କାଗଜ

ନୂଆଦିଲ୍ଲୀ: ମୁମ୍ବାଇ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ତହବୁର ରାଣାଙ୍କୁ ଏନଆଇଏ ପଚରାଉଚରା ଜାରି ରଖିଛି। ଗତକାଲି ଅର୍ଥାତ୍ ଶନିବାର ଦିନ ଦ୍ୱିତୀୟ ଦିନ ପଚରାଉଚରା ହୋଇଥିଲା। ପ୍ରଥମ ଦିନରେ ତାଙ୍କୁ ତିନି ଘଣ୍ଟା ଧରି ପଚରାଉଚରା କରାଯାଇଥିଲା। ଏହି ସମୟ ମଧ୍ୟରେ ଆତଙ୍କବାଦୀଙ୍କୁ ଅନେକ ପ୍ରଶ୍ନ ପଚରାଯାଇଥିଲା।

ହିନ୍ଦୁସ୍ତାନ ଟାଇମ୍ସ ଅନୁଯାୟୀ, ମୁମ୍ବାଇ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ତହବୁର ରାଣା ସେଲ୍ ଭିତରେ କୁରାନ, କଲମ ଏବଂ କାଗଜ ମଗାଇଛନ୍ତି। ତାଙ୍କୁ କୌଣସି ସ୍ୱତନ୍ତ୍ର ଚିକିତ୍ସା ଦିଆଯାଉନାହିଁ।  ଜଣେ ଗିରଫ ବ୍ୟକ୍ତି ସହିତ ଯେପରି ବ୍ୟବହାର କରାଯାଏ, ତାଙ୍କ ସହିତ ମଧ୍ୟ ସେହିପରି ବ୍ୟବହାର କରାଯାଉଛି। ତାଙ୍କ ଅନୁରୋଧ କ୍ରମେ, ତାଙ୍କୁ କୁରାନର ଏକ କପି ଯୋଗାଇ ଦିଆଯାଇଛି ବୋଲି ଏଆଇଏର ଜଣେ ବରିଷ୍ଠ ଅଧିକାରୀ କହିଛନ୍ତି।

ଅଧିକାରୀ କହିଛନ୍ତି ଯେ, ରାଣା କୁରାନର ଏକ କପି ମାଗିଥିଲେ, ଯାହା ଆମେ ପ୍ରଦାନ କରିଛୁ। ସେ ତାଙ୍କ କୋଠରୀରେ ପାଞ୍ଚ ଥର ନମାଜ ପଢୁଥିବାର ଦେଖାଯାଉଛି। କୁରାନ ସହିତ ରାଣା କଲମ ଏବଂ କାଗଜ ମଧ୍ୟ ମାଗିଥିଲେ ଯାହା ତାଙ୍କୁ ଯୋଗାଇ ଦିଆଯାଇଛି। ତଥାପି, ସେ ଯେପରି କଲମ ଦ୍ୱାରା ନିଜକୁ କ୍ଷତି ନ ପହଞ୍ଚାନ୍ତି, ସେଥିପାଇଁ ତାଙ୍କୁ କଡ଼ା ନଜରରେ ରଖାଯାଇଛି। ଏହା ବ୍ୟତୀତ ସେ ଅନ୍ୟ କୌଣସି ଜିନିଷ ମଗାଇ ନାହାନ୍ତି। 

ସୂଚନାଯୋଗ୍ୟ, ରାଣାଙ୍କୁ ପ୍ରତିଦିନ ତାଙ୍କ ଓକିଲଙ୍କୁ ଭେଟିବାକୁ ଅନୁମତି ଦିଆଯାଇଛି ଏବଂ ପ୍ରତି ୪୮ ଘଣ୍ଟାରେ ତାଙ୍କର ଡାକ୍ତରୀ ପରୀକ୍ଷା କରାଯାଉଛି। ରାଣାଙ୍କୁ ଆମେରିକାରୁ ପ୍ରତ୍ୟାର୍ପଣ କରାଯିବା ପରେ, ତାଙ୍କୁ ୧୮ ଦିନର ଏନଆଇଏ ହେପାଜତକୁ ପଠାଯାଇଥିଲା। ଗୁରୁବାର ସନ୍ଧ୍ୟାରେ ରାଣା ଆମେରିକାରୁ ଭାରତ ଆସିଥିଲେ।

ତାଙ୍କୁ ୟୁଏପିଏ ଅଧୀନରେ ଗିରଫ କରାଯାଇଛି। ତାଙ୍କ ଉପରେ ମୁମ୍ବାଇ ଆତଙ୍କବାଦୀ ଆକ୍ରମଣର ଷଡଯନ୍ତ୍ର ରଚନା କରିବାର ଅଭିଯୋଗ ରହିଛି। ଶୁକ୍ରବାର ସକାଳେ ତାଙ୍କୁ ଏନଆଇଏ ମୁଖ୍ୟାଳୟକୁ ଅଣାଯାଇଥିଲା। ସେବେଠାରୁ ତଦନ୍ତକାରୀ ସଂସ୍ଥା ତାଙ୍କୁ ପଚରାଉଚରା ଜାରି ରଖିଛି।