ମାଲକାନଗିରି Iତା:୨୬/୪

ଛତିଶଗଡ଼ର ଦନ୍ତେୱାଡା ଜିଲ୍ଲାରେ ଆଇଇଡି ବିସ୍ଫୋରଣରେ ଗାଡ଼ି ଚାଳକ ସହ ୧୧ ଡିଆରଜି (ଜିଲ୍ଲା ରିଜର୍ଭ ଗାର୍ଡ) ଯବାନ ଶହୀଦ ହୋଇଛନ୍ତି । ଦାନ୍ତେୱାଡାର ଅରନପୁର ନିକଟରେ ଯବାନଙ୍କୁ ନେଇ ଯାଉଥିବା ଗାଡ଼ି ନକ୍ସଲଙ୍କ ଦ୍ୱାରା ପୂର୍ବରୁ ବିଛା ଯାଇଥିବା ଆଇଇଡି ବିସ୍ଫୋରଣ ଶିକାର ହୋଇଛି । ମୁଖ୍ୟମନ୍ତ୍ରୀ ଭୂପେଶ ବଘେଲ ଘଟଣାର ସ୍ପଷ୍ଟ କରିବା ସହ ଦୁଃଖ ପ୍ରକାଶ କରିଛନ୍ତି । ଗୃହ ମନ୍ତ୍ରୀ ଅମିତ୍ ଶାହ ମୁଖ୍ୟମନ୍ତ୍ରୀ ବଘେଲଙ୍କ ସହ ସ୍ଥିତି ବିଷୟରେ କଥା ହୋଇଛନ୍ତି | ଅନ୍ୟପଟେ ନକ୍ସଲ ଆକ୍ରମଣ ପରେ ଓଡ଼ିଶାର ତିନି ଜିଲ୍ଲାକୁ ହାଇ ଆଲର୍ଟରେ ରଖାଯାଇଛି । କୋରାପୁଟ, ମାଲକାନଗିରି, ନବରଙ୍ଗପୁର ଜିଲ୍ଲାରେ ହାଇ ଆଲର୍ଟ କରାଯାଇଛି । ସୀମାରେ ଚେକିଂ, ବ୍ଲକିଂ କଡ଼ାକଡ଼ି ପାଇଁ ନିର୍ଦ୍ଦେଶ ଦିଆଯାଇଛି । ଏହାସହ କମ୍ୱିଂ ଅପରେସନକୁ ଜୋରଦାର କରାଯାଇଛି। ରାଜ୍ୟ ପୋଲିସ ଗୁଇନ୍ଦା ନିର୍ଦ୍ଦେଶକ ସଞ୍ଜୀବ ପଣ୍ଡା ସୂଚନା ଦେଇଛନ୍ତି। ନକ୍ସଲ ହମଲା ନେଇ ବସ୍ତର ଆଇ.ଜି.ପି ସୁନ୍ଦରରାଜନ କହିଛନ୍ତି ଯେ, ଘଟଣାସ୍ଥଳରେ ୧୦ ଯବାନ ଏବଂ ଜଣେ ଡ୍ରାଇଭରଙ୍କ ପ୍ରାଣହାନୀ ଘଟିଛି। ଘଟଣାସ୍ଥଳରୁ ମୃତଦେହ ଉଦ୍ଧାର କରାଯାଇଛି। ବରିଷ୍ଠ ପୋଲିସ ଅଧିକାରୀ ଘଟଣାସ୍ଥଳରେ ପହଞ୍ଚିଥିବା ବେଳେ ସର୍ଚ୍ଚ ଅପରେସନ ଜାରି ରହିଛି। ଶହୀଦ ଯବାନଙ୍କ ନାମ ହେଲା ଜୋଗା ସୋଡି, ମୁନ୍ନାରାମ କଡତି, ସନ୍ତୋଷ ତାମୋ, ଦୁଲଗି ମଣ୍ଡାବି, ଲଖମୁ ମରକାମ, ଜୋଗା କବାସୀ, ହରିରାମ ମଣ୍ଡାବି, ରାଜୁରାଜ କରଟମ, ଜୟରାମ ପୋଡିୟାମ, ଜଗଦୀଶ କବାସୀ ଏବଂ ମୃତ ଡ୍ରାଇଭରଙ୍କ ନାମ ଧନୀରାମ ଯାଦ ହୋଇଥିବା ଛତିଶଗଡ ପକ୍ଷରୁ ସୂଚନା ଦିଆଯାଇଛି। ମୁଖ୍ୟମନ୍ତ୍ରୀ ଭୂପେଶ ବଘେଲ ଟ୍ୱିଟ୍ କରି କହିଛନ୍ତି ଯେ ନକ୍ସଲଙ୍କ ଉପସ୍ଥିତି ସୂଚନା ପାଇଁ ଯବାନମାନେ ଅପରେସନରେ ଯାଇଥିଲେ । ସେ ଲେଖିଛନ୍ତି, ‘ଦନ୍ତେୱାଡାର ଥାନା ଅରନପୁର ଅନ୍ତର୍ଗତ ମାଓବାଦୀ କ୍ୟାଡରର ଉପସ୍ଥିତିର ସୂଚନା ଉପରେ ନକ୍ସଲ ବିରୋଧୀ ଅଭିଯାନ ପାଇଁ ପହଞ୍ଚିଥିବା ଡିଆରଜି ବଳ ଉପରେ ଆଇଇଡି ବିସ୍ଫୋରଣରେ ଆମର ୧୦ ଜିଆରଜି ଯବାନ ଏବଂ ଜଣେ ଚାଳକ ଶହୀଦ ହୋଇଥିବା ଖବର ଦୁଃଖଦାୟକ । ସମସ୍ତ ଦେଶବାସୀ ନିଜ ଶ୍ରଦ୍ଧାଞ୍ଜଳି ଅର୍ପଣ କରୁଛନ୍ତି । ଯବାନଙ୍କ ପରିବାର ବର୍ଗଙ୍କ ସହ ଆମେ ସମବେଦନା ଜଣାଇଛନ୍ତି I