ଓଡିଆ ସ୍ତମ୍ଭ ସାହିତ୍ୟ ସମ୍ମାନ ୨୦୨୩ ପାଇଁ ନାମାଙ୍କନ ଆହ୍ବାନ

ନୂଆଦିଲ୍ଲୀ – ୦୬/୦୬
ନୂଆଦିଲ୍ଲୀ ସ୍ଥିତ ଓଡିଆ ବୁଦ୍ଧିଜୀବୀ ଫୋରମ ‘ଦି ଇଣ୍ଟେଲେକ୍ଟସ’ ଆନୁକୂଲ୍ୟରେ ପ୍ରଦାନ କରାଯାଉଥିବା ଓଡିଆ ସ୍ତମ୍ଭ ସାହିତ୍ୟ ସମ୍ମାନ-୨୦୨୩ ପାଇଁ ପାଠକମାନଙ୍କୁ ତାଙ୍କର ପ୍ରିୟ ସ୍ତମ୍ଭକାରଙ୍କ ନାମ ସୁପାରିଶ କରିବା ପାଇଁ ଅନୁଷ୍ଠାନ ତରଫରୁ ଅଧ୍ୟକ୍ଷ ଦେବେନ୍ଦ୍ର ନାଥ ରାଉତ ନିବେଦନ କରିଛନ୍ତି| ବିଶିଷ୍ଟ ସ୍ତମ୍ଭକାର ଡଃ ଭଗବାନ ପ୍ରକାଶଙ୍କ ପ୍ରୟାସରେ ୨୦୨୧ ମସିହା ଠାରୁ ଓଡିଆ ଭାଷାରେ ପ୍ରଥମ ଥର ପାଇଁ ଆନୁଷ୍ଠାନିକ ଭାବରେ ସ୍ତମ୍ଭ ସାହିତ୍ୟ କ୍ଷେତ୍ରରେ ବିଶେଷ ଅବଦାନ ରଖିଥିବା ଲେଖକମାନଙ୍କୁ ସମ୍ମାନିତ କରିବାର ଏହି ମର୍ଯ୍ୟାଦାଜନକ ପ୍ରକ୍ରିୟା ଆରମ୍ଭ ହୋଇଛି| ପ୍ରତ୍ୟକ ଭାଷାରେ ସ୍ତମ୍ଭ ସାହିତ୍ୟ ଉଭୟ ପାଠକ ଓ ଲେଖକଙ୍କ ପାଖରେ ଏକ ଗୁରୁତ୍ବପୂର୍ଣ୍ଣ ସ୍ଥାନ ଗ୍ରହଣ କରିଥିବା ସତ୍ବେ ଏହାକୁ ସ୍ବତନ୍ତ୍ର ସ୍ଵୀକୃତି ପ୍ରଦାନ କରାଯାଇନାହିଁ| ଦି ଇଣ୍ଟେଲେକ୍ଟସର ଏହି ପ୍ରୟାସ ଅତ୍ୟନ୍ତ ପ୍ରଭାବଶାଳୀ ଓ ସୁଦୂର ପ୍ରସାରୀ ବୋଲି ଅନେକ ବିଶିଷ୍ଟ ସାହିତ୍ୟିକ ମତ ଦେଇଛନ୍ତି| ୨୦୨୩ ମସିହା ପାଇଁ ପାଠକ ମାନେ ତାଙ୍କର ପ୍ରିୟ ସ୍ତମ୍ଭକାରଙ୍କ ସବିଶେଷ ବିବରଣୀ ଚଳିତ ଜୁନ ମାସ ୩୦ ତାରିଖ ସୁଦ୍ଧା ଇମେଲ ବା ହ୍ଵାଟ୍ସଆପ ମାଧ୍ୟମରେ ନିମ୍ନରେ ପ୍ରଦତ୍ତ ଠିକଣାରେ ପଠାଇବା ପାଇଁ ସଂଗଠନ ତରଫରୁ ଅନୁରୋଧ କରାଯାଇଛି| ଲେଖକଙ୍କ ନାମ, ଠିକଣା, ଟେଲିଫୋନ ନମ୍ବର, ଇମେଲ ଠିକଣା ସହିତ ତାଙ୍କ ଦ୍ବାରା ଲିଖିତ ସ୍ତମ୍ଭ ଗୁଡିକର ସଙ୍କଳନର ସବିଶେଷ ବିବରଣୀ ପଠାଇବା ଅତ୍ୟନ୍ତ ଜରୁରୀ ଅଟେ | ସର୍ବସାଧରଣରୁ ପ୍ରାପ୍ତ ନାମାଙ୍କନକୁ ଏକ ସ୍ବତନ୍ତ୍ର ବିଚାରକ ମଣ୍ଡଳୀ ବିଚାର କରି ଅନ୍ତିମ ଘୋଷଣା କରିବେ| ବିଗତ ଦୁଇ ବର୍ଷରେ ଦୁଇଜଣ ବିଶିଷ୍ଟ ସ୍ତମ୍ଭକାର ସୌମ୍ଯରଞ୍ଜନ ପଟ୍ଟନାୟକ ଓ ଗୌରହରି ଦାସଙ୍କୁ ଏହି ସମ୍ମାନ ପ୍ରଦାନ କରାଯାଇଛି| ପାଠକ ମାନଙ୍କ ଦ୍ବାରା ବିଶେଷ ଦାବି ହେବା ଯୋଗୁଁ ଚଳିତ ବର୍ଷ ଠାରୁ ଯୁବ ସ୍ତମ୍ଭକାରମାନଙ୍କୁ ଉତ୍ସାହିତ କରିବା ପାଇଁ ଯୁବବର୍ଗକୁ ଏହି ସମ୍ମାନରେ ସାମିଲ କରାଯିବ| ଏଣୁ ପାଠକମାନଙ୍କୁ ଅନୁରୋଧ ସେମାନେ ୨୦୨୩ ମସିହା ଓଡିଆ ସ୍ତମ୍ଭ ସାହିତ୍ୟ ସମ୍ମାନ ପାଇଁ ଉଭୟ ବରିଷ୍ଠ ଓ ଯୁବ ବର୍ଗରେ ତାଙ୍କର ପ୍ରିୟ ଲେଖକମାନଙ୍କୁ ମନୋନୀତ କରିବା ପାଇଁ ନାମାଙ୍କନ ପ୍ରେରଣ କରିବେ| ହ୍ଵାଟ୍ସଆପ ନମ୍ବର +୯୧-୯୩୫୦୧୨୭୩୭୦ ଏବଂ ଇମେଲ: info.intellects@gmail.com ଠିକଣାରେ ନାମାଙ୍କନ ପଠାଇବାକୁ ଅନୁରୋଧ| ସମସ୍ତ ପ୍ରକ୍ରିୟା ସମାପନ ପରେ ଏକ ସ୍ବତନ୍ତ୍ର ଉତ୍ସବରେ ଏହି ସମ୍ମାନ ପ୍ରଦାନ କରାଯିବ|