ଭୁମଣ୍ଡଳୀକରଣ ଓ ଉଦାରୀକରଣ ସମୟରେ ଅନୁବାଦକାର୍ଯ୍ୟ ବ୍ୟାପକ ହେଉଅଛି l

ପ୍ରଥମେ ଅନୁବାଦ ଏକ ସୀମିତ ସୀମାରେଖା ପର୍ଯ୍ୟନ୍ତ ବ୍ୟାପ୍ତ ଥିଲା। ବିଶେଷଭାବେ କେବଳ ପୌରାଣିକ, ଧାର୍ମିକ ଓ ସାହିତ୍ୟିକ କ୍ଷେତ୍ରଥିଲା ଏହାର ପୃଷ୍ଠଭୂମି। କିନ୍ତୁ ଆଧୁନିକ ସମୟରେ ଏହାର କ୍ଷେତ୍ର ବେଶ୍ ବ୍ୟାପକ ହୋଇପାରିଛି। ଭୁମଣ୍ଡଳୀକରଣ ଓ ଉଦାରୀକରଣ ଯୋଗୁଁ ଅନୁବାଦ କାର୍ଯ୍ୟ ବ୍ୟାପକ ହେବାସହ ବିଭିନ୍ନ କ୍ଷେତ୍ରରେ ନିଜର ନିଜ ମହତ୍ତ୍ୱ ପ୍ରତିପାଦିତ କରିପାରିଛି। ଏଥିପାଇଁ ଅନୁବାଦର ପ୍ରାସଙ୍ଗିକତା ବୃଦ୍ଧି ପାଇବା ସହ ଚିକିତ୍ସା, ବାଣିଜ୍ୟ – ବେପାର,ବିଜ୍ଞାନ, ଉଦ୍ୟୋଗ ଆଦି କ୍ଷେତ୍ରରେ ମଧ୍ୟ ଅନୁବାଦ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଅଛି। ବର୍ତ୍ତମାନ ସମୟରେ ଅନୁବାଦକୁ ଆଧାର କରି ଯୁବାବର୍ଗ ଜୀବିକା ଉପାର୍ଜନ କରିପାରୁଛନ୍ତି ତେଣୁ ଛାତ୍ରଛାତ୍ରୀ ଓ ଯୁବକମାନେ ଏ ଦିଗରେ ଆଗ୍ରହ ପ୍ରଦର୍ଶନ କରିବା ଆବଶ୍ୟକ ବୋଲି ବିଭିନ୍ନ ଭାରତୀୟ ଭାଷାର ବିଶିଷ୍ଟ ଅନୁବାଦକମାନେ ମତବ୍ୟକ୍ତ କରିଛନ୍ତି।
ଭାରତୀୟ ଅନୁବାଦ ସାହିତ୍ୟ ତରଫରୁ ବିଭିନ୍ନ ମହାବିଦ୍ୟାଳୟର ଛାତ୍ରୀଙ୍କୁ ନେଇ ଅନଲାଇନ ମାଧ୍ୟମରେ ଆୟୋଜିତ ହୋଇଥିବା ଏହି ଜାତୀୟସ୍ତରୀୟ କାର୍ଯ୍ୟକ୍ରମକୁ ସଂଚାଳନ କରିଥିଲେ ସଂଗଠନର ସଂପାଦକ ଶରତ ଚନ୍ଦ୍ର ଆଚାର୍ଯ୍ୟ। ଏହି କାର୍ଯ୍ୟକ୍ରମରେ ଖଡ଼ଗପୁର ମହାବିଦ୍ୟାଳୟର ହିନ୍ଦୀ ବିଭାଗର ପ୍ରଫେସର ଡ. ପଙ୍କଜ ସାହା, ବିଶିଷ୍ଟ ସାହିତ୍ୟିକ ଓ ଅନୁବାଦକ ଡ. ଚିତ୍ତରଞ୍ଜନ ମିଶ୍ର, କବି ଓ ଅନୁବାଦକ ଅଧ୍ୟାପକ ଡ. ସଂଜୟ କୁମାର ମିଶ୍ର, ଯୋଗାଚାର୍ଯ୍ୟ ସନାତନ ମହାକୁଡ଼, ଗାଜିଆବାଦର ଖ୍ୟାତନାମା ସାହିତ୍ୟିକା କସ୍ତୁରିକା ପ୍ରମୁଖ ଉପସ୍ଥିତ ଥିବା ଛାତ୍ରଛାତ୍ରୀମାନଙ୍କୁ ଅନୁବାଦ ସାହିତ୍ୟ ଓ ଅନୁବାଦର ପ୍ରାସଙ୍ଗିକତା ଉପରେ ଦିଗଦର୍ଶନ ଦେବା ସହ ପ୍ରଶ୍ନୋତ୍ତର ମାଧ୍ୟମରେ ବିସ୍ତୃତ ଆଲୋଚନା କରିଥିଲେ।
ଏହି କାର୍ଯ୍ୟକ୍ରମରେ ଅଜିତ କୁମାର ଭାର୍ଗବ, ସ୍ମୃତିରଂଜନ ପରିଡା,ମାନସୀ ମେହେର,ବିଶାଳ ସାହୁ,ଟି. ତେଜସ୍ଵିନୀ, ଭାଗ୍ୟବନ୍ତ ମହାଲିଙ୍ଗ, ଅପରାଜିତା ମିର୍ଦ୍ଧା,କାଜଲ ମହାଖୁଡ ପ୍ରମୁଖ ୨୫ ରୁ ଉର୍ଦ୍ଧ୍ବ ଛାତ୍ରଛାତ୍ରୀ ଅଂଶଗ୍ରହଣ କରିବାସହ ଅନୂଦିତ ବହୁଭାଷୀ କାବ୍ୟପାଠ କରିଥିଲେ। ଧନ୍ୟବାଦ ପ୍ରଦାନ କରିଥିଲେ ସୁସଂଯୋଜିକା ଏବଂ କବି ମିତା ପଟ୍ଟନାୟକଙ୍କ। ଭାରତୀୟ ଅନୁବାଦ ସାହିତ୍ୟ ତରଫରୁ ବିଭିନ୍ନ ସମୟରେ ଛାତ୍ରଛାତ୍ରୀମାନଙ୍କୁ ନେଇ ଅନୁବାଦ ସାହିତ୍ୟ ଆଧାରିତ କାର୍ଯ୍ୟକ୍ରମ ଆୟୋଜନ ହେବ ବୋଲି ସଂପାଦକ ସୂଚନା ପ୍ରଦାନ କରିଥିଲେ।