ଦୀର୍ଘ ଦିନ ଧରି ଖତ ଖାଉଛି ଅଳିଆ ବୁହା ଗାଡି,ସାଧାରଣରେ ଅସନ୍ତୋଷ

କୁକୁଡାଖଣ୍ଡି,:ଗ୍ରାମାଞ୍ଚଳରେ ଲୋକଙ୍କ ଅଳିଆକୁ ଘର ଘର ବୁଲି ସଂଗ୍ରହ କରିବାକୁ ନିୟୋଜିତ ଥିବା ସରକାରଙ୍କ ଅଳିଆ ଗାଡି ବର୍ତ୍ତମାନ ଖତ ଖାଉଛି । ଏହାର ପ୍ରତିକାର ନକରି ବ୍ଲକ ପ୍ରଶାସନ ମରାମତି କରାଯିବ କହି ଚୁପ ବସିଛି । କୁକୁଡାଖଣ୍ଡି ବ୍ଲକର ପ୍ରତି ଗ୍ରାମାଞ୍ଚଳରେ ସ୍ୱଛତା ରଖିବା ସହ ପରିବେଶକୁ ମଧ୍ୟ ସ୍ୱଚ୍ଛତା ରଖିବା ଦୃଷ୍ଟିକୁ ନେଇ ସରକାର ବହୁ ଯୋଜନା ପ୍ରଣୟନ କରୁଥିବା ବେଳେ କୁକୁଡାଖଣ୍ଡି ବ୍ଲକ ଅଞ୍ଚଳରେ ”ମୋ ସ୍ୱାଭିମାନ ସ୍ୱଚ୍ଛ ଗଞ୍ଜାମ” ଆନୁକୂଲ୍ୟରେ ଜିଲ୍ଲା ପ୍ରଶାସନ ତରଫରୁ ସରକାରଙ୍କ ଲକ୍ଷ ଲକ୍ଷ ଟଙ୍କା ଅର୍ଥ ମଞ୍ଜୁର କରାଯାଇ ଆବର୍ଜନା ନିଷ୍କାସନ ନିମନ୍ତେ ଗାଡି ପ୍ରଦାନ କରିଥିଲେ । ଏଠାରେ ଆବର୍ଜନା ଉଠାଉଥିବା ଗାଡି ଗୁଡିକର ସଠିକ ପରିଚାଳନା ଅଭାବରୁ କୁକୁଡାଖଣ୍ଡି ବ୍ଲକର ବହୁ ସ୍ଥାନରେ ଅଳିଆ ଆବର୍ଜନା ବୁହାଯାଉଥିବା ତିନି ଚକିଆ ଓ ଚାରି ଚକିଆ ଗାଡି ଗୁଡିକ ବାସ୍ତବରେ ନିଜେ ଅଳିଆ ଆବର୍ଜନା ଭଳି ପଡି ଖତ ଖାଉଥିବା ଦେଖାଦେଇଛି । କିନ୍ତୁ ବ୍ଲକ ପ୍ରଶାସନ ତରଫରୁ ଏହାକୁ ଅଣଦେଖା କରୁଥିବାରୁ କୁମ୍ଭକର୍ଣ୍ଣ ନିଦ୍ରାରେ ଚେଇଁ ସୋଇଛି ପ୍ରଶାସନ ବୋଲି ସାଧାରଣରେ ଅଭିଯୋଗ ପ୍ରକାଶ ପାଇଛି । ଶୁଖିଲା ବର୍ଯ୍ୟବସ୍ତୁ ନିଷ୍କାସନ ଗାଡିଗୁଡିକ ବ୍ଲକର ନିମଖଣ୍ଡି ପଞ୍ଚାୟତରେ ଡିଜେଲ ଚାଳିତ ସହ ବ୍ୟାଟେରି ଚାଳିତ ୨ଟି ଡାଲା ବିଶିଷ୍ଟ ଗାଡି ଖତ ଖାଇ ରହିଥିବା ବେଳେ ଲୋଚାପଡ଼ାରେ ୬ ଚକିଆ ଡାଲା ଯୁକ୍ତ ଟ୍ରାକ୍ଟର ଓ କୁକୁଡାଖଣ୍ଡି ପଂଚାୟତରେ ମଧ୍ୟ ବ୍ୟାଟେରି ଚାଳିତ ଗାଡିର ମଧ୍ୟ ସମାନ ଅବସ୍ଥା ହୋଇଛି । ବହୁ ପଞ୍ଚାୟତରେ ଲକ୍ଷ ଲକ୍ଷ ଟଙ୍କାର ବ୍ୟବହୃତ ମୋ ସ୍ୱାଭିମାନ ସ୍ୱଚ୍ଛ ଗାଡି ଗୁଡିକ ଖତ ହୋଇ ନଷ୍ଟ ହେବାକୁ ଯାଉଅଛି । ହେଲେ ପ୍ରଶାସନର ମନମୁଖୀ କାର୍ଯ୍ୟ ପାଇଁ ଏହି ଗାଡି ଗୁଡିକ ସଜଡାନଯାଇ କାର୍ଯ୍ୟରେ ନିୟଜିତ କରିବା ମନବୃତ୍ତି ନଥିବା ଅଭିଯୋଗ ହୋଇଛି । ଏନେଇ ବ୍ଲକ ବିଡ଼ିଓ ପଲ୍ଲବୀ ସ୍ୱାଇଁଙ୍କୁ ବିପଚାରିବାରୁ ସେ କହିଛନ୍ତି ଯେ,ଏହି ଗାଡି ଗୁଡିକ ସହରାଞ୍ଚଳ ଭଳି ଜନ ଗହଳି ସ୍ଥାନକୁ ବ୍ୟାଟେରି ଗାଡି ଗୁଡିକ ଯୋଗାଇଥିବା ବେଳେ ଗାଡି ମାନଙ୍କ ଯନ୍ତ୍ରଂଶ ଖରାପ ଥିବାରୁ କମ୍ପାନୀଙ୍କୁ ମରାମତି ପାଇଁ କୁହାଯାଇଥିବା କହିଛନ୍ତି । ଅନ୍ୟ ଡିଜେଲ ଚାଳିତ ଗାଡି ଗୁଡିକ ପଡିରହିଥିବା ବେଳେ ତାହା ଅସଜଡାରେ ଖତ ଅବସ୍ଥାରେ ପଡିଛି । ଲୋକଙ୍କ ସ୍ୱାର୍ଥରେ ନିୟୋଜିତ ଗାଡିର ସଠିକ ଭାବେ ରକ୍ଷଣାବେକ୍ଷଣ ଅଭାବ ଯୋଗୁଁ ଏବେ ଦୟନୀୟ ଅବସ୍ଥାରେ ପଡ଼ିରହିଛି । ସରକାରଙ୍କ ଅର୍ଥ ବ୍ୟୟ ହେଉଛି କିନ୍ତୁ ସଠିକ ଉପଯୋଗ ହୋଇପାରୁନଥିବା ନେଇ ସାଧାରଣରେ କ୍ଷୋଭ ପ୍ରକାଶ ପାଇଛି ।