ଶ୍ରୀନିବାସ ମେମୋରିଆଲ ଆୱାର୍ଡ ପାଇଲେ ବନଖଣ୍ଡ ଅଧିକାରୀ ସନି ଖୋଖର

ବ୍ରହ୍ମପୁର ବନଖଣ୍ଡ ଅଧିକାରୀ ସନି ଖୋଖର ଫିଲ୍ଡ ଫରେଷ୍ଟ ମ୍ୟାନେଜମେଣ୍ଟରେ ଉତ୍ତମ ପଦର୍ଶନ କରିଥିବାରୁ ପି ଶ୍ରୀନିବାସ ମେମୋରିଆଲ ସମ୍ମାନରେ ସମ୍ମାନୀତ ହୋଇଛନ୍ତି। ଗୁରୁବାର ଦିନ ଦେରାଦୁନ ସ୍ଥିତ ଇନ୍ଦିରା ଗାନ୍ଧୀ ନ୍ୟାସନାଲ ଫରେଷ୍ଟ ଏକାଡେମୀ ପରିସରରେ ଆୟୋଜିତ ସମାବର୍ତ୍ତନ ଉତ୍ସବରେ କେନ୍ଦ୍ର ସରକାରଙ୍କ ଜଙ୍ଗଳ ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗର ଡାଇରେକ୍ଟର ଜେନେରାଲ ତାଙ୍କୁ ଏହି ସମ୍ମାନ ପ୍ରଦାନ କରିଛନ୍ତି। ସୂଚନା ମୁତାବକ 2020-22 ମସିହା ମଧ୍ୟରେ ପ୍ରଭିଜନାରୀ ସମୟରେ ନିଜର ଉତ୍ତମ କାର୍ଯ୍ୟ ଦକ୍ଷତା ପ୍ରତିପାଦନ ସହିତ ଭଲ ପଦର୍ଶନ ପାଇଁ ତାଙ୍କୁ ଏହି ଜାତୀୟ ସମ୍ମାନ ପ୍ରଦାନ କରାଯାଇଛି। ଆଜି ସେ ଏହିପରି ସମ୍ମାନରେ ସମ୍ମାନୀତ ହୋଇ ନିଜକୁ ଗର୍ବ ମନେ କରୁଥିବା କହିଛନ୍ତି। ସେହିପରି ଡେରାଦୁନ ଠାରେ ଆୟୋଜିତ ଏହି କାର୍ଯ୍ୟକ୍ରମରେ କେନ୍ଦ୍ର ସରକାରଙ୍କ ଜଙ୍ଗଳ ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗର ଡାଇରେକ୍ଟର ଜେନେରାଲ ସିପି ଗୋୟଲ, ଇନ୍ଦିରା ଗାନ୍ଧୀ ନ୍ୟାସନାଲ ଫରେଷ୍ଟ ଏକାଡେମୀର ନିର୍ଦ୍ଦେଶକ ଭରତ ଜ୍ୟୋତି, ଆଇସିଏଫଆରଇର ଡାଇରେକ୍ଟର ଜେନେରାଲ ଅରୁଣ ସିଂ ରାୱତଙ୍କ ସମେତ ବହୁ ବରିଷ୍ଟ ଅଧିକାରୀ ଅତିଥି ରୂପେ ଯୋଗଦାନ କରିଥିଲେ। ବନଖଣ୍ଡ ଅଧିକାରୀ ଏହି ସମ୍ମାନ ପାଇବା ପରେ ବିଭାଗୀୟ କର୍ମଚାରୀଙ୍କ ସମେତ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିଛି।