ମନରେଗା ଯୋଜନାରେ ବ୍ଯାପକ  ଅନିୟମିତତା ଅଭିଯୋଗ, ଭିଜିଲାନ୍ସ ତଦନ୍ତ ଦାବି।

ନିମାପଡ଼ା,(ପି .ଏନ) ପୁରୀ ଜିଲ୍ଲା ଗୋପ ବ୍ଲକ ଅଧିନସ୍ଥ ସୋରଭା ଗ୍ରାମପଞ୍ଚାୟତରେ ଜବକାର୍ଡ ହିତାଧିକାରୀମାନଙ୍କୁ ଉପେକ୍ଷା କରି ମେଶିନ ଲଗାଇ ମନରେଗା ଯୋଜନାରେ ଗୋଷ୍ଠୀ ପୋଖରୀ ଖନନ, ଅମୃତ ସରୋବର  ପୋଖରୀ ଖନନ ପ୍ରଭୁତି ବ୍ୟାପକ  ଅନିୟମିତତା କରାଯାଇଥିବା ଗ୍ରାମବାସୀ ମାନେ ଅଭିଯୋଗ କରିବା ସହ ଘଟଣାର ଭିଜିଲାନ୍ସ ତଦନ୍ତ ଦାବି କରିଛନ୍ତି। ଅଭିଯୋଗପତ୍ର ଅନୁସାରେ ସୋରଭା ଗ୍ରାମପଞ୍ଚାୟତରେ ୨୦୨୨-୨୩  ଆର୍ଥିକ ବର୍ଷରେ ମନରେଗା ଯୋଜନାରେ ପ୍ରାୟ ୮୦ ଲକ୍ଷରୁ ଉର୍ଦ୍ଧ୍ବ ଟଙ୍କାର କାର୍ଯ୍ୟ କରାଯାଇଛି। ତେବେ ଏହି ଗ୍ରାମପଞ୍ଚାୟତ ଦାୟିତ୍ବରେ ଥିବା ଗ୍ରାମ ରୋଜଗାର ସେବକ, କନିଷ୍ଠ ଯନ୍ତ୍ରୀ ଓ ବ୍ଳକ ମନରେଗା ସହାୟିକା ମିଳିତ ଭାବେ କମ କାର୍ଯ୍ୟ କରି ଲକ୍ଷାଧିକ ଟଙ୍କା ହରିଲୁଟ କରିଥିବା ଅଭିଯୋଗ ପତ୍ର ରେ ଦର୍ଶାଯାଇଛି।ଏହି ଗ୍ରାମପଞ୍ଚାୟତ ର ଜବକାର୍ଡ ଧାରୀ ମାନେ କାର୍ଯ୍ୟ ନ ପାଇ ହାତ ବାନ୍ଧି ଘରେ ବସିଥିବାବେଳେ ସବୁ କାର୍ଯ୍ୟ ବେଆଇନ ଭାବେ ମେସିନ ଦ୍ଵାରା କରାଯାଇଥିବାରୁ ଜବକାର୍ଡ ପାଇଥିବା ହିତାଧିକାରୀ ମାନଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଛି। ଏହି ଗ୍ରାମପଞ୍ଚାୟତରେ ମନରେଗା ଯୋଜନାରେ ଜହ୍ନିବାଲିଆ ହାଟ ଠାରେ ନିର୍ମିତ ଖେଳ ପଡିଆ, ଗ୍ରାମ ପଞ୍ଚାୟତ ଅଧୀନରେ ଥିବା ଗୋଷ୍ଠୀ ପୋଖରୀ ଖନନ, ରାସ୍ତା ପାର୍ଶ୍ବରେ ନଡ଼ିଆ ଗଛ ଲଗାଇବା, ମନରେଗା ଯୋଜନାରେ କେନ୍ଦ୍ର ସରକାରଙ୍କ ଅମୃତ ସରୋବର ଯୋଜନା ରେ ପୁଷ୍କରିଣୀ ଖନନ, ବିଭିନ୍ନ ସ୍ଥାନରେ ମାଟି ପୋତା କାମ ସମେତ ମନରେଗା ଯୋଜନାରେ ସଂପାଦିତ ସମସ୍ତ କାର୍ଯ୍ୟ ମେଶିନ ଦ୍ବାରା  କରାଯାଇ ଲକ୍ଷାଧିକ ଟଙ୍କାର ମନରେଗା ଅର୍ଥର ଦୁରୁପଯୋଗ କରାଯାଇଥିବା ଜବକାର୍ଡ ହିତାଧିକାରୀ ମାନେ ଅଭିଯୋଗରେ ଦର୍ଶାଇଛନ୍ତି। ସରକାର ଯେଉଁ ଲକ୍ଷ୍ୟ ନେଇ ଜବକାର୍ଡ ହିତାଧିକାରୀ ମାନଙ୍କ ହିତ ସାଧନ ନିମନ୍ତେ କେନ୍ଦ୍ର ଓ ରାଜ୍ୟ ସରକାର ମନରେଗା ଯୋଜନା ମାଧ୍ୟମରେ ୧୦୦ ଦିନର କର୍ମ ସଂସ୍ଥାନ ଜବକାର୍ଡ ହିତାଧିକାରୀ ମାନଙ୍କୁ ଯୋଗାଇ ଦେବାକୁ ପ୍ରତିଶ୍ରୁତି ବଦ୍ଧତା ନୀତି ଆପଣାଇଥିଲେ ତାହା ସୋରଭା ଗ୍ରାମପଞ୍ଚାୟତରେ ଫଳପ୍ରଦ ହୋଇପାରୁନାହିଁ ବୋଲି ସାଧାରଣରେ ମତପ୍ରକାଶ ପାଇଛି। ଏହି ଗ୍ରାମପଞ୍ଚାୟତର ନିର୍ବାଚିତ ଲୋକପ୍ରତିନିଧି, ଗ୍ରାମ ରୋଜଗାର ସେବକ, କାର୍ଯ୍ୟ ନିର୍ବାହୀ ଅଧିକାରୀ, କନିଷ୍ଠ ଯନ୍ତ୍ରୀ ଓ ବ୍ଳକ ମନରେଗା ସହାୟକଙ୍କ ଅସାଧୁ ମେଣ୍ଟ ଯୋଗୁ ସମସ୍ତ କାର୍ଯ୍ୟ ମେଶିନ ଦ୍ବାରା ସଂପାଦନ ହେବା ଫଳରେ ଜବକାର୍ଡ ହିତାଧିକାରୀ ମାନଙ୍କୁ ନିରାଶାର ବାତାବରଣ ମଧ୍ୟରେ କାଳାତିପାତ କରିବାକୁ ପଡୁଛି। ଏହି ଗ୍ରାମ ପଞ୍ଚାୟତ ରେ ସମାଙ୍କୁଲା ଗ୍ରାମ ଠାରେ ମନରେଗା ଯୋଜନାରେ ଅମୃତ ସରବୋର ପୁଷ୍କରିଣୀ ଖନନ କାର୍ଯ୍ୟକୁ ଅନୁଧ୍ୟାନ କଲେ କିଭଳି ଭାବେ ଏହି ଗ୍ରାମପଞ୍ଚାୟତରେ ସରକାରୀ ନିୟମର ଖୋଲାଖୋଲି ଉଲ୍ଲଂଘନ କରି ମନରେଗା ଯୋଜନାର ସଫଳ ରୂପାୟନ ପରିବର୍ତ୍ତେ ଆସିଥିବା ଅର୍ଥ କିଭଳି ନାମକୁ ମାତ୍ର କାର୍ଯ୍ୟ କରି ବାଟମାରଣା ପାଇଁ ଷଡଯନ୍ତ୍ର ଚାଲିଛି ତାହା ଏଥିରୁ ସ୍ପଷ୍ଟ ପ୍ରତୀୟମାନ ହେଉଛି। ଏହି ପୁଷ୍କରିଣୀର କାମ ନିମ୍ନମାନର ହୋଇଥିବା ବେଳେ ଶ୍ରମିକ ବଦଳରେ ମେଶିନରେ ନାମକୁ ମାତ୍ର ଖୋଳା ଯିବା ଦ୍ଵାରା ପୋଖରୀ ବେଢାରୁ ମାଟି ଅତଡା ଖସି ପୋଖରୀ ପୋତି ହେବାରେ ଲାଗିଛି ବୋଲି ଗ୍ରାମବାସୀ ମାନେ ଅଭିଯୋଗ କରିଛନ୍ତି। ସୋରଭା ଗ୍ରାମପଞ୍ଚାୟତ ରେ ମନରେଗା କାମ ସଠିକ ଭାବେ କାର୍ଯ୍ୟକାରୀ କରା ନ ଯାଇ ଅର୍ଥ ହରିଲୁଟ ପାଇଁ ସରକାରୀ ଅଧିକାରୀ ଓ ନିର୍ବାଚିତ ଲୋକପ୍ରତିନିଧିଙ୍କ ମଧ୍ୟରେ ଏକ ଅଘୋଷିତ ଅସାଧୁମେଣ୍ଟ ଚାଲିଥିବା ଚର୍ଚ୍ଚା ଜୋର ଧରିଛି। ଏହି ଗ୍ରାମପଞ୍ଚାୟତରେ ୨୦୨୨-୨୩ ଆର୍ଥିକ ବର୍ଷରେ ହୋଇଥିବା ମନରେଗା ଯୋଜନାର ସମସ୍ତ କାର୍ଯ୍ୟର ଭିଜିଲାନ୍ସ ତଦନ୍ତ ପାଇଁ ପୁରୀ ଜିଲ୍ଲାପାଳ ନିର୍ଦେଶ ପ୍ରଦାନ କରିବା ପାଇଁ ଗ୍ରାମ ପଞ୍ଚାୟତର ଶତାଧିକ ଉପେକ୍ଷିତ ଜବକାର୍ଡ ହିତାଧିକାରୀ, ବୁଦ୍ଧିଜୀବୀ, ସଚେତନ ନାଗରିକ ଓ ବରିଷ୍ଠ ନାଗରିକ ମାନଙ୍କ ପକ୍ଷରୁ ଦାବି କରାଯାଇଛି।