ଜାତୀୟ ରାଜପଥ ବିରୁଦ୍ଧରେ ୬ ଥାନାରେ ଅଭିଯୋଗ

ଅନୁଗୁଳ:

ଜାତୀୟ ରାଜପଥ ବିଭାଗ ନାମରେ ଥାନାରେ ଅଭିଯୋଗ । ଏକାଥରକେ ୬ ଟି ଥାନାରେ ଅଭିଯୋଗ କଲା ଅନୁଗୁଳ ଓକିଲ ସଂଘ । ସୂଚନା ଅନୁସାରେ ୨୦୧୭ ମସିହାରୁ ଅନୁଗୁଳ ଜିଲ୍ଲା ଦେଇ ଯାଇଥିବା ଜାତୀୟ ରାଜପଥ ୫୫ ର ଅବସ୍ଥା ଶୋଚନୀୟ ହୋଇ ପଡିଛି । ସମ୍ପ୍ରସାରଣ କାର୍ଯ୍ୟ ଚାଲୁଥିଲେ ମଧ୍ୟ ଆଜି ଯାଏ ସରୁ ନାହିଁ । ଯାହା ଫଳରେ ଜାତୀୟ ରାଜପଥରେ ଆଣ୍ଠୁଏ ଆଣ୍ଠୁଏ ଖାଲ ସାଙ୍ଗକୁ ଦୁର୍ଘଟଣା ବଢିଛି । ଅନେକ ଲୋକ ମୃତାହତ ହେଲେଣି । ଓକିଲ ସଂଘର କହିବା କଥା ଏହି ଜାତୀୟ ରାଜପଥ ଯୋଗୁଁ ୨୦୨୧ ମସିହାରେ ୪୪୬ ଟି ଦୂର୍ଘଟଣା , ୨୦୨୨ ମସିହାରେ ୩୭୪ ଟି , ୨୦୨୩ରେ ବର୍ତ୍ତମାନ ସୁଧା ୨୩୦ ଟି ଦୂର୍ଘଟଣା ଘଟିଛି । ଯେତେ ଦାବି ଆପତ୍ତି କଲେ ମଧ୍ୟ କୌଣସି ସୁଫଳ ମିଳୁ ନାହିଁ । ଏହାକୁ ନେଇ ଆଜି ଅନୁଗୁଳ ଓକିଲ ସଂଘ ପକ୍ଷରୁ ବଅଁରପାଳ , ନାଲକୋନଗର , ଅନୁଗୁଳ , ଅନୁଗୁଳ ସଦର , ବନ୍ତଳା ଓ ଜରପଡ଼ା ଥାନାରେ ଜାତୀୟ ରାଜପଥ ବିଭାଗ ନାମରେ ଅଭିଯୋଗ କରାଯାଇଛି । ଏହା ସହ ଗତ କିଛିଦିନ ତଳେ ଜଣେ ସ୍କୁଲ ଫେରନ୍ତା ଛାତ୍ରୀଙ୍କ ଦୁର୍ଘଟଣାରେ ମୃତ୍ୟୁ ପରଦିନ ଛାତ୍ରଛାତ୍ରୀ ଓ ସ୍ଥାନୀୟ ଲୋକ ରାଜପଥ ଅବରୋଧ କରିଥିଲେ । ଏହି ଘଟଣାରେ ୫୫୦ ଜଣଙ୍କ ନାମରେ ମାମଲା ରୁଜ୍ଜୁ ହୋଇଛି । ଏହାକୁ ମଧ୍ୟ ନାପସନ୍ଦ କରିଛି ଓକିଲ ସଂଘ । ଯେଉଁ ୫୫୦ ଜଣଙ୍କ ନାମରେ ମାମଲା ରୁଜ୍ଜୁ ହୋଇଛି ତାକୁ ପ୍ରତ୍ୟାହାର କରିବାକୁ ଦାବି କରାଯାଇଛି । ଅନ୍ୟପଟେ ବନ୍ତଳା ଓ ସାତକୋଶିଆ ଅଞ୍ଚଳରେ ହାତୀ ବସତି ମୁହାଁ ହେବା ଫଳରେ ଧନ ଜୀବନ ହାନି ହେଉଛି । ହାତୀ ମଧ୍ୟ ମୃତ୍ୟୁ ମୁଖରେ ପଡୁଛନ୍ତି । ଏଥିପାଇଁ ବନ ବିଭାଗକୁ ଦାୟୀ କରି ବନ ବିଭାଗ ଅଧିକାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବନ୍ତଳା ଥାନାରେ ଅଭିଯୋଗ ହୋଇଛି ।