ଡୁବୁରିଠାରେ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରର ନୂତନ ବ୍ଲକ ପ୍ରତିଷ୍ଠା ପାଇଁ ଭୂମିପୂଜା l

ଯାଜପୁର (କଳିଙ୍ଗନଗର) :- ଗୋଷ୍ଠୀ ବିକାଶ ପ୍ରତି ନିଜର ପ୍ରତିବଦ୍ଧତାକୁ ଦୋହରାଇ, ଟାଟା ଷ୍ଟିଲ ଫାଉଣ୍ଡେସନ ଦ୍ଵାରା ନିର୍ମିତ
ହେବାକୁ ଥିବା ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରର ନୂତନ ବ୍ଲକର ଶିଳାନ୍ୟାସ ମଙ୍ଗଳବାର ଦିନ ଯାଜପୁର ଜିଲ୍ଲା ଡୁବୁରିଠାରେ ଗ୍ରାମ୍ୟ ଉନ୍ନୟନ, ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ଇଂଜିନିୟର ପ୍ରୀତିରଞ୍ଜନ ଘଡେଇ କରିଛନ୍ତି ।
ଜିଲ୍ଲା ସ୍ୱାସ୍ଥ୍ୟ ପ୍ରଶାସନ ଓ ଟାଟା ଷ୍ଟିଲ ଫାଉଣ୍ଡେସନର ମିଳିତ ଉଦ୍ୟମରେ ଏହି ପ୍ରକଳ୍ପ ଅଂଚଳରେ ପ୍ରାଥମିକ ସ୍ୱାସ୍ଥ୍ୟ ଭିତିଭୂମିକୁ ସୁଦୃଢ଼ କରିବା ସହ ସୁକିନ୍ଦା ବ୍ଳକର ଡୁବୁରି ଓ ଆଖପାଖ ପଂଚାୟତରେ ରହୁଥିବା ଲୋକଙ୍କୁ ସେବା ଯୋଗାଇବ ।
ଟାଟା ଷ୍ଟିଲ ଫାଉଣ୍ଡେସନ ଦ୍ଵାରା ନିର୍ମିତ ହେବାକୁ ଥିବା ପିଏଚସିର ନୂତନ ବ୍ଲକ ୩୭୦୦ ବର୍ଗଫୁଟର ହେବ ଏବଂ ଚଳିତ ଆର୍ଥିକ ବର୍ଷ ଶେଷ ସୁଦ୍ଧା ଏହା ସମ୍ପୂର୍ଣ୍ଣ ହେବ ବୋଲି ଆଶା କରାଯାଉଛି । ମୌଳିକ ଭିତିଭୂମି ବ୍ୟତୀତ ପ୍ରସ୍ତାବିତ ବ୍ଲକର ଛାତ ଉପର ବର୍ଷା ଜଳ ସଂରକ୍ଷଣ, ସୌର ଭିତିକ ବିଜୁଳି ଏବଂ ଏକ ଗଭୀର ନଳକୂପର ବ୍ୟବସ୍ଥା ରହିବ । ଅନ୍ୟମାନଙ୍କ ମଧ୍ୟରେ ସୁକିନ୍ଦା ବ୍ଲକ ଉପାଧ୍ୟକ୍ଷା ଭାଗ୍ୟଲକ୍ଷ୍ମୀ ରାଉତ, ସୁକିନ୍ଦା ବ୍ଳକର ଜିଲ୍ଲା ପରିଷଦ ସଭ୍ୟ (ୱାର୍ଡ ନଂ-୩୮) ସାଧୁଚରଣ ଟିୟୁ, କଳିଙ୍ଗନଗର ଟାଟା ଷ୍ଟିଲ ଫାଉଣ୍ଡେସନର ୟୁନିଟ୍ ମୁଖ୍ୟ ଆଲେନ୍ ଜୋସେଫ୍ ପ୍ରମୁଖ ଉପସ୍ଥିତ ଥିଲେ ।(ଉମାକାନ୍ତ ମହାପାତ୍ର ଙ୍କ ରିପୋର୍ଟ)