ସାଙ୍ଗଙ୍କ ସହିତ ସପିଂ ମଲ୍ ଯାଉଥିଲେ ଯୁବକ; ଭୁବନେଶ୍ବରରେ ଭିଡ଼ ଭିତରୁ ବଳପୂର୍ବକ ଉଠାଇ ନେଲେ ଦୁର୍ବୃତ୍ତ
ଭୁବନେଶ୍ବର: ପାର୍ବଣ ସମୟ ଆରମ୍ଭ ହୋଇଯାଇଥିବା ବେଳେ ରାଜଧାନୀ ଭୁବନେଶ୍ବରରେ ଅସାମାଜିକ ବ୍ୟକ୍ତିମାନେ କାୟା ବିସ୍ତାର କରିଛନ୍ତି। ଭୁବନେଶ୍ୱର ଏସପ୍ଲନେଡ଼ ମଲ୍ ଆଗରୁ ମଙ୍ଗଳବାର ଜଣେ ଯୁବକଙ୍କୁ ଦୁର୍ବୃତ୍ତମାନେ ଅପହରଣ କରି ନେଇଛନ୍ତି। ଅପହରଣ ହୋଇଥିବା ଯୁବକଙ୍କ ନାମ ପ୍ରିୟବ୍ରତ ସାହୁ। ସେ କେନ୍ଦୁଝର ଜିଲ୍ଲା ନିବାସୀ ଅଟନ୍ତି।
ସୂଚନା ଅନୁସାରେ କେନ୍ଦୁଝର ଜିଲ୍ଲା ଆନନ୍ଦପୁର ଥାନା ବେଲବାହାଲି ଗାଁର ପ୍ରିୟବ୍ରତ ସାହୁ ଆଜି ସନ୍ଧ୍ୟାରେ ତାଙ୍କର ଜଣେ ବନ୍ଧୁଙ୍କ ସହ ରସୁଲଗଡରୁ ମଲକୁ ଆସୁଥିଲେ। ଏହି ସମୟରେ ଏକ ଧଳା ରଙ୍ଗର କାରରେ ଘଟଣାସ୍ଥଳରେ କିଛି ଦୁର୍ବୃତ୍ତ ପହଞ୍ଚି ଥିଲେ। ଏହାପରେ ସେମାନେ ବଳପୂର୍ବକ ପ୍ରିୟବ୍ରତଙ୍କୁ ଉଠାଇ ଗାଡ଼ିରେ ନେଇଯାଇଥିଲେ। ତାଙ୍କ ସାଙ୍ଗ ଚିତ୍କାର କରିଥିଲେ ବି ଦୁର୍ବୃତ୍ତମାନେ ଘଟଣାସ୍ଥଳରୁ ଆଖିପିଛୁଳାକେ ପଳାଇ ଯାଇଥିଲେ। ଏନେଇ ସହିଦ ନଗର ଥାନାରେ ପ୍ରିୟବ୍ରତଙ୍କ ସାଙ୍ଗ ଲିଖିତ ଅଭିଯୋଗ କରିଛନ୍ତି। ଅପହରଣ ପଛର କାରଣ ଜଣା ପଡିନଥିବା ବେଳେ ପୁଲିସ ଛାନଭିନ ଆରମ୍ଭ କରିଛି।
ତେବେ ଟଙ୍କା ପାଇଁ ଅପହରଣ ହୋଇଥିବା ସୂଚନା ମିଳିଛି। ଅପହୃତ ହେଇଥିବା ପ୍ରିୟବ୍ରତ ୨୦ ଲକ୍ଷ ଟଙ୍କା ନେଇ ଫେରାଉ ନଥିବା କାରଣରୁ ଟଙ୍କା ଦେଇଥିବା ଲୋକ ଉଠାଇ ନେଇଥିବା ଜଣାପଡ଼ିଛି। ଏନେଇ ଅଧିକ ତଦନ୍ତ କରୁଛି ସହିଦ ନଗର ଥାନା ପୁଲିସ।