ବିଶ୍ବକପ୍ : ରୋମାଞ୍ଚକର ମ୍ୟାଚରେ ପାକିସ୍ତାନକୁ ୧ ଓ୍ବିକେଟରେ ହରାଇଲା ଦକ୍ଷିଣ ଆଫ୍ରିକା

ଚେନ୍ନାଇ : ଚେନ୍ନାଇର ଏମଏ ଚିଦାମ୍ବରମ୍ ଷ୍ଟାଡିୟମଠାରେ ଚାଲିଥିବା ଆଇସିସି ବିଶ୍ବକପର ଏକ ରୋମାଞ୍ଚକର ମ୍ୟାଚରେ ପାକିସ୍ତାନକୁ ୧ ଓ୍ବିକେଟରେ ହରାଇଦେଇଛି ଦକ୍ଷିଣ ଆଫ୍ରିକା । ଏହା ସହ ପାକିସ୍ତାନର ପରାଜୟ ଧାରା ଜାରି ରହିଛି । ପାକିସ୍ତାନ ବୋଲରଙ୍କ ମାପଚୁପ ବୋଲିଂ ସତ୍ତ୍ବେ ଶେଷ ଓ୍ବିକେଟ ଯୋଡ଼ିରେ ଦକ୍ଷିଣ ଆଫ୍ରିକା ଜିତି ଯାଇଥିଲା । ୪୮ ଓଭରର ୨ୟ ବଲରେ କେଶବ ମହାରାଜ ମହମ୍ମଦ ନଓ୍ବାଜଙ୍କ ବଲରେ ଚୌକା ମାରି ବିଜୟ ଆଣିଦେଇଥିଲେ ।

ପାକିସ୍ତାନ ଦ୍ବାରା ଦକ୍ଷିଣ ଆଫ୍ରିକା ଆଗରେ ୨୭୧ ରନର ବିଜୟ ଲକ୍ଷ୍ୟ ରଖାଯାଇଥିବାବେଳେ ଦକ୍ଷିଣ ଆଫ୍ରିକା ୪୭.୨ ତମ ଓଭରରେ ୯ ଓ୍ବିକେଟ ହରାଇ ହାସଲ କରିନେଇଥିଲା । ଦଳ ପକ୍ଷରୁ ଆଇଡେନ ମାର୍କରାମ ୯୧ ରନ କରିଥିବାବେଳେ ଡେଭିଡ ମିଲର ୨୯ ରନ ଓ ତେମ୍ବା ବାଭୁମା ୨୮ ରନ କରିଥିଲେ ।

ଏହି ମ୍ୟାଚରେ ପାକିସ୍ତାନ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । କିନ୍ତୁ ପାକିସ୍ତାନର ଦୁଇ ଓପନର ଶୀଘ୍ର ପାଭିଲିୟନ ଫେରିବା ପରେ ବାବର ଆଜମ ଓ ମହମ୍ମଦ ରିଜଓ୍ବାନ ସତର୍କତାର ସହ ବ୍ୟାଟିଂ କରି ଦଳୀୟ ସ୍କୋରକୁ ଆଗେଇ ନେଇଥିଲେ । ବାବର ୫୦ ରନ ଓ ରିଜଓ୍ବାନ ୩୧ ରନ କରିଥିଲେ । ମାତ୍ର ଏହି ଦୁଇ ବ୍ୟାଟ୍ସମ୍ୟାନ ପାଭିଲିୟନ ଫେରିବା ପରେ ଇଫତିଖାର ଅହମ୍ମଦ ବି ସହଳ ପାଭିଲିୟନ ଫେରିଥିଲେ ଓ ଦଳ ମାତ୍ର ୧୪୧ ରନରେ ୫ଟି ଓ୍ବିକେଟ ହରାଇଥିଲା । ତେବେ ସାଉଦ ସକିଲ ଓ ସଦାବ ଖାଁ ଲଢୁଆ ବ୍ୟାଟିଂ କରି ସ୍କୋରକୁ ଏକ ସମ୍ମାନଜନକ ସ୍ତରକୁ ନେଇଯାଇଥିଲେ । ସକିଲ ୫୨ ଓ ସଦାବ ୪୩ରନ କରିଥିଲେ ।