ଶାହରୁଖ ଖାନଙ୍କୁ ଜନ୍ମଦିନର ଶୁଭେଚ୍ଛା ଜଣାଇବାକୁ ଆସିଥିବା ୩୪ଜଣ ଫ୍ୟାନ୍ସଙ୍କ ଫୋନ ଚୋରି ହେଲା

ମୁମ୍ବାଇ: ବଲିଉଡ ବାଦଶାହା ଶାହରୁଖ ଖାନଙ୍କ ୨୦୨୩ ନଭେମ୍ବର ୨ ତାରିଖରେ ଜନ୍ମଦିନ ଥିଲା। ଗତ ନଭେମ୍ବର ଦୁଇରେ ଶାହରୁଖ ୫୮ ବର୍ଷ ବୟସର ପ୍ରଦାର୍ପଣ କରିଛନ୍ତି ।ତେବେ ଶାହରୁଖଙ୍କ ଜନ୍ମଦିନ ଅବସରରେ କିଙ୍ଗ ଖାନଙ୍କ ଏକ ଝଲକ ପାଇବା ପାଇଁ ତାଙ୍କ ଘର ମନ୍ନତ ସମ୍ମୁଖରେ ପ୍ରଶଂସକଙ୍କ ପ୍ରବଳ ଭିଡ଼ ଜମିଥିଲା । ଶାହରୁଖ ମଧ୍ୟ ନିଜ ଫ୍ୟାନ୍ସଙ୍କୁ ନିରାଶ କରି ନଥିଲେ । ବିଳମ୍ବିତ ରାତିରେ ଅର୍ଥାତ ରାତି ୧୨ଟା ସମୟରେ ଘର ଛାତ ଉପରକୁ ବାହାରି ପ୍ରଶଂସକଙ୍କୁ ଅଭିବାଦନ ଜଣାଇଥିଲେ ।

ଏହି ଭିଡିରେ ଅନେକ ଚୋର ବି ସାମିଲ ହୋଇଥିଲେ। ଯେଉଁମାନେ କି ସୁଯୋଗ ଦେଖି ଶାହରୁଖଙ୍କ ଫ୍ୟାନ୍ସମାନଙ୍କ ଠାରୁ ମୋବାଇଲ ଓ ପର୍ସ ଚୋରି କରି ନେଇଥିଲେ। ଥାନାରେ ରୁଜୁ ହୋଇଥିବା ଅଭିଯୋଗ ମୁତାବକ, ଶାହରୁଖଙ୍କୁ ଜନ୍ମଦିନ ଶୁଭେଚ୍ଛା ଜଣାଇବାକୁ ଆସିଥିବା ଶହଶହ ଫ୍ୟାନ୍ସଙ୍କ ମଧ୍ୟରୁ ୩୪ଜଣଙ୍କ ମୋବାଇଲ ଚୋରି ହୋଇଯାଇଥିଲା।  ପ୍ରିୟ ଷ୍ଟାରଙ୍କୁ ଜନ୍ମଦିନର ଶୁଭେଚ୍ଛା ଜଣାଇ ଖୁସିରେ ଘରକୁ ଫେରୁଥିବା ବେଳେ ଏଭଳି ଚୋରିର ଶିକାର ହେବାପରେ ନିରାଶ ହୋଇଯାଇଥିଲେ ଫ୍ୟାନ୍ସ।

ଫୋନ ଚୋରି ହୋଇଥିବା ଫ୍ୟାନ୍ସଙ୍କ ମୁତାବକ,‘ ପୁଲିସର କଡ଼ା ସୁରକ୍ଷା ବ୍ୟବସ୍ଥା ଥିଲା। ଏହା ସତ୍ତ୍ବେ ବି ଚୋର କେମିତି ଫୋନ ଚୋରି କରି ନେଇଗଲା ଆମେ ଜାଣିବି ପାରିଲୁ ନାହିଁ। ସେଥିରେ ଶାହରୁଖଙ୍କ ଖୁବ ସୁନ୍ଦର ସୁନ୍ଦର ଫଟୋ ଆମେ ଉଠାଇଥିଲୁ। ଫୋନ ସହିତ ସେ ସ୍ମୃତି ବି ଚାଲିଗଲା। ପୁଲିସକୁ ଅନୁରୋଧ କି ସିସିଟିଭି ଦେଖି ହେଉ ଅବା ଯେକୌଣସି ଉପାୟରେ ହେଉ ଚୋରକୁ କାବୁ କି ଚୋରି ହୋଇଥିବା ଫୋନକୁ ଜବତ କରୁ।’

ADVERTISEMENT