ବିଶ୍ବକପ୍ : ଶ୍ରୀଲଙ୍କାକୁ ୫ ଓ୍ବିକେଟରେ ହରାଇଲା ନ୍ୟୁଜିଲାଣ୍ଡ, ସେମିଫାଇନାଲ ଖେଳିବା ଉଜ୍ଜଳ

ବେଙ୍ଗାଲୁରୁ : ବେଙ୍ଗାଲୁରୁ ର ଏମଏ ଚିନ୍ନାସ୍ବାମୀ ଷ୍ଟାଡିୟମଠାରେ ଗୁରୁବାର ଖେଳାଯାଇଥିବା ବିଶ୍ବକପର ଏକ ଗୁରୁତ୍ବପୂର୍ଣ୍ଣ ମ୍ୟାଚରେ ଶ୍ରୀଲଙ୍କାକୁ ୫ ଓ୍ବିକେଟରେ ହରାଇଦେଇଛି ନ୍ୟୁଜିଲାଣ୍ଡ । ଶ୍ରୀଲଙ୍କା ଦ୍ବାରା ରଖାଯାଇଥିବା ୧୭୨ ରନର ବିଜୟ ଲକ୍ଷ୍ୟକୁ ୨୩.୨ ଓଭରରେ ହାସଲ କରିନେଇଥିଲା । ନ୍ୟୁଜିଲାଣ୍ଡ ପକ୍ଷରୁ ଡେଓ୍ବନ କନଓ୍ବେ ୪୫ରନ, ରାଚିନ ରବୀନ୍ଦ୍ର ୪୨ ରନ ଓ ଡାରିଲ ମିଚେଲ ୪୩ରନ କରିଥିଲେ ।

ଏହି ବିଜୟ ସହ ନ୍ୟୁଜିଲାଣ୍ଡ ୧୦ ପଏଣ୍ଟ ସହ ସେମିଫାଇନାଲ ଖେଳିବା ଆଶା ଉଜ୍ଜଳ ହୋଇଛି । ସେପଟେ ପାକିସ୍ତାନ ପାଇଁ ସେମିଫାଇନାଲ ରାସ୍ତା ଆହୁରି କଷ୍ଟକର ହୋଇଯାଇଛି । ସେମିଫାଇନାଲ ଯିବାକୁ ହେଲେ ପାକିସ୍ତାନକୁ ନିଜ ଶେଷ ଲିଗ ମ୍ୟାଚରେ ଇଂଲଣ୍ଡକୁ ଏକ ବଡ଼ ବ୍ୟବଧାନରେ ହରାଇବାକୁ ପଡ଼ିବ ।

ଏହି ମ୍ୟାଚରେ ନ୍ୟୁଜିଲାଣ୍ଡ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା । ଶ୍ରୀଲଙ୍କା ଆରମ୍ଭରୁ ହିଁ ନିୟମିତ ବ୍ୟବଧାନରେ ଓ୍ବିକେଟ ହରାଇଚାଲିଥିଲା । ଦଳର ସ୍କୋର ମାତ୍ର ୩ ରନ ହୋଇଥିଲା ଓପନର ପ୍ରଥୁମ ନିଶଙ୍କା ୨ ରନ କରି ଆଉଟ ହୋଇଥିଲେ । ତେବେ ଅନ୍ୟପଟେ ଓପନର କୁଶଲ ପରେରା ବିସ୍ଫୋରକ ବ୍ୟାଟିଂର ପ୍ରଦର୍ଶନ କରି ମାତ୍ର ୨୮ଟି ବଲରେ ୫୧ରନ କରିଥିଲେ । ମାତ୍ର ଦଳର ଅନ୍ୟବ୍ୟାଟ୍ସମ୍ୟାନମାନେ ବିଫଳ ହୋଇଥିଲେ ଓ ଦଳ ଗୁରୁତର ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା । ଏପରିକି ଦଳ ୧୨୮ ରନରେ ୯ଟି ଓ୍ବିକେଟ ହରାଇଥିଲା । ତେବେ ଶେଷ ଓ୍ବିକେଟ ଯୋଡ଼ିରେ ମହିସ ତିକସନା ଓ ଦିଲସାନ ମଧୁଶଙ୍କା ବେଶ କିଛି ସମୟ ଧରି ନ୍ୟୁଜିଲାଣ୍ଡ ବୋଲରଙ୍କ ଭଲ ମୁକାବିଲା କରିଥିଲେ । ତିକସନା ୩୯ ରନ କରିଥିବାବେଳେ ମଧୁଶଙ୍କା ୧୯ ରନ କରିଥିଲେ । ଶ୍ରୀଲଙ୍କା ୪୬.୪ ତମ ଓଭରରେ ୧୭୧ ରନ କରି ଅଲଆଉଟ ହୋଇଯାଇଥିଲା ।