ପିଓକେକୁ ନେଇ ଏଭଳି କହିଲେ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହା

ରାଞ୍ଚି: ଆଜି ଝାଡଖଣ୍ଡର ଖୁଣ୍ଟିରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା କଂଗ୍ରେସକୁ କଡ଼ା ଟାର୍ଗେଟ କରିଛନ୍ତି। ସେ କହିଛନ୍ତି ଯେ ଆଜି ମଣି ଶଙ୍କର ଆୟାର ଆମକୁ ଧମକ ଦେଉଛନ୍ତି, ପରମାଣୁ ବୋମା ଥିବାରୁ ସେ ପାକିସ୍ତାନକୁ ସମ୍ମାନ ଦେବାକୁ କହୁଛନ୍ତି। ଅମିତ ଶାହା କହିଛନ୍ତି ଯେ କିଛି ଦିନ ପୂର୍ବରୁ ଫାରୁକ୍ ଅବଦୁଲ୍ଲା ଆମକୁ ପିଓକେ ବିଷୟରେ କିଛି ନ କହିବାକୁ କହିଥିଲେ କାରଣ ପାକିସ୍ତାନ ପାଖରେ ପରମାଣୁ ବୋମା ଅଛି। ସାଧାରଣ ସଭାକୁ ସମ୍ବୋଧିତ କରି ଅମିତ ଶାହା କହିଛନ୍ତି, “ଆଜି ମୁଁ ଇଣ୍ଡିଆ ମେଣ୍ଟର ନେତାମାନଙ୍କୁ କହିବାକୁ ଚାହେଁ ଯେ ପିଓକେ ଭାରତର ଏବଂ ଏହାକୁ କେହି ଆମଠାରୁ ଛଡ଼ାଇ ନେଇ ପାରିବେ ନାହିଁ। ପିଓକେକୁ ଭାରତ ସହ ମିଶ୍ରଣ କରିବା କଥା କହିବା ପରିବର୍ତ୍ତେ କଂଗ୍ରେସ ଆମକୁ ପରମାଣୁ ବୋମା କଥା କହି ଧମକ ଦେଉଛି |

କେନ୍ଦ୍ର ଗୃହମନ୍ତ୍ରୀ ଅମିତ ଶାହା କହିଛନ୍ତି ଯେ ପାକିସ୍ତାନରୁ ପିଓକେକୁ ଆଣିବା ପରିବର୍ତ୍ତେ କଂଗ୍ରେସ ପରମାଣୁ ବୋମା ବିଷୟରେ କହି ଭାରତବାସୀଙ୍କୁ ଭୟଭୀତ କରୁଛି। ଆମ ସଂସଦ ବହୁମତରେ ଏହି ପ୍ରସ୍ତାବ ପାରିତ କରିଛି ଯେ ପିଓକେ ଭାରତର ଅଂଶ | ପିଓକେର ପ୍ରତ୍ୟେକ ଇଞ୍ଚ ଜମି ଭାରତର ଏବଂ ଏହା ଭାରତରେ ରହିବା ଉଚିତ। କଂଗ୍ରେସ ଉପରେ ଆକ୍ରମଣ କରି ଗୃହମନ୍ତ୍ରୀ ଅମିତ ଶାହା କହିଛନ୍ତି ଯେ କିଛି ଦିନ ପୂର୍ବରୁ କଂଗ୍ରେସ ସାଂସଦଙ୍କ ଘରୁ ନଗଦ ୩୫୦ କୋଟି ଟଙ୍କା ଜବତ କରାଯାଇଥିଲା । ଏହି ସମସ୍ତ ଟଙ୍କା ହେଉଛି ସାଧାରଣ ଲୋକଙ୍କର, ଏହା ମୋର ଆଦିବାସୀ ଭାଇମାନଙ୍କର, ଯାହା ରାହୁଲ ବାବାଙ୍କ ଦଳ ଦ୍ୱାରା ଲୁଟ୍ ହୋଇଛି |