ନୂଆଦିଲ୍ଲୀ : ପୋଲିସ ଡିଜିଙ୍କୁ ସୁପ୍ରିମକୋର୍ଟଙ୍କ ନୋଟିସ୍ । ଏକ ଦୁର୍ଘଟଣା ବୀମା ଜାଲିଆତି ମାମଲାରେ ଅବହେଳା ପ୍ରଦର୍ଶନ ନେଇ ନୋଟିସ୍ କରିଛନ୍ତି ସୁପ୍ରିମକୋର୍ଟ । ଜଷ୍ଟିସ ଅହସାନୁଦ୍ଦିନ ଅମାନୁଲ୍ଲା ଏବଂ ପ୍ରସନ୍ନ ବି. ଭରାଲେଙ୍କ ଖଣ୍ଡପୀଠ ଆସନ୍ତା ୧୫ ତାରିଖ ସୁଦ୍ଧା ସତ୍ୟପାଠ ଦାଖଲ ପାଇଁ ନିର୍ଦ୍ଦେଶ ଦେଇଛନ୍ତି । ୨୦୧୭ ଅକ୍ଟୋବରରେ ୧୯ରେ ଘଟିଥିବା ଏକ ଦୁର୍ଘଟଣା ବୀମା ଜାଲିଆତି ମାମଲାର ଶୁଣାଣି କରି ଏଭଳି ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ ନ୍ୟାୟାଳୟ ।
ହାଇକୋର୍ଟରେ ଚାଲିଥିବା ଏକ ବୋଲେରୋ ପିକ୍-ଅପ୍ ଭ୍ୟାନ୍ ଦୁର୍ଘଟଣା ଓ କ୍ଷତିପୂରଣ ସଂକ୍ରାନ୍ତ ମାମଲାରୁ ବିବାଦ ଆରମ୍ଭ ହୋଇଥିଲା । ସମାନ ଗାଡ଼ିକୁ ଦେଖାଇ ୫ଟି ଅଲଗା ଅଲଗା କ୍ଷତିପୂରଣ ଦାବି କରାଯାଇଥିଲା । ଯାହାକୁ ନେଇ ବୀମା କଂପାନି ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲେ । କୋର୍ଟ ଗାଡ଼ିର ମାଲିକାନା ଓ ବୀମା ବିବରଣୀକୁ ନେଇ ତଦନ୍ତ ନିର୍ଦ୍ଦେଶ ଦେଇଥିଲେ ।
ଡିଜିପିଙ୍କୁ ବୀମା କମ୍ପାନୀରୁ ଆବଶ୍ୟକ ରେକର୍ଡ ସଂଗ୍ରହ ସହ ସମସ୍ତ ତଥ୍ୟ ସଂଗ୍ରହ କରିବାରୁ ଦାୟିତ୍ୱ ଦେଇଥିଲେ ସୁପ୍ରିମକୋର୍ଟ । ମାତ୍ର ଡିଜିପି ୱାଇ ବି ଖୁରାନିଆ କୌଣସି ବ୍ୟକ୍ତିଗତ ତଦାରଖ ନକରି କେବଳ କଟକ ସ୍ଥିତ ସିଆଇଡି , କ୍ରାଇମବ୍ରାଞ୍ଚ ଡିଏସପିଙ୍କୁ ଏହି ଦାୟିତ୍ୱ ହସ୍ତାନ୍ତର କରିଥିଲେ। କୋର୍ଟରେ ଡିସିପ ଦାଖଲ କରିଥିବା ରିପୋର୍ଟରେ କୌଣସି ନୂତନ ତଦନ୍ତ ଅବା ବୀମା କଂପାନି ଠାରୁ ଗୁରୁତ୍ବପୂର୍ଣ୍ଣ ସ୍ପଷ୍ଟୀକରଣ ଅଣଦେଖା କରାଯାଇଥିଲା ।
ଏପରିକି ରାଜ୍ୟ ପକ୍ଷରୁ ନିଯୁକ୍ତ ଓକିଲ ମଧ୍ୟ ତଦନ୍ତରେ ଅବହେଳା ନେଇ ସନ୍ତୋଷଜନକ ଉତ୍ତର ରଖିପାରିନଥିଲେ । ଯାହାକୁ ନେଇ ସୁପ୍ରିମକୋର୍ଟ କ୍ଷୁବ୍ଧ ହେବା ସହ ବ୍ୟକ୍ତିଗତ ଭାବେ ସତ୍ୟପାଠ ଦାଖଲ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ଡିଜିପିଙ୍କ ବିରୋଧରେ କାହିଁକି ଅଦାଲତ ଅବମାନନା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ, ସତ୍ୟପାଠରେ ଦର୍ଶାଇବାକୁ କୋର୍ଟଙ୍କ ନିର୍ଦ୍ଦେଶ ରହିଛି ।
About the Author
