ଖଡ଼ଗପୁର : ରାସ୍ତାକଡ଼ ଦୋକାନୀଙ୍କ ପାଇଁ ଆଇଆଇଟି ଖଡ଼ଗପୁରର ନୂଆ ଉଦ୍ଭାବନ । ସୋଲାର ପାୱାର୍ଡ ଫୁଡ଼ ଷ୍ଟଲ ବିକଶିତ କରଛି ଖଡ଼ଗପୁର ଆଇଆଇଟି । ରାସ୍ତାକଡ଼ର ବ୍ୟବସାୟୀମାନଙ୍କୁ ସ୍ବାବଲମ୍ବୀ ଉଦ୍ୟୋଗୀ ଭାବେ ଗଢ଼ି ତୋଳିବାକୁ ପ୍ରତିଷ୍ଠାନ ଲକ୍ଷ୍ୟ ରଖିଛି । ପ୍ରତିଷ୍ଠାନର ପ୍ଲାଟିନମ୍ ଜୁବିଲି ପଦକ୍ଷେପର ଅଂଶସ୍ବରୂପ ୧୬ ତାରିଖରେ ଏହାକୁ ଆନୁଷ୍ଠାନିକ ଭାବେ ଉନ୍ମୋଚନ କରାଯାଇଛି। ପ୍ରକଳ୍ପର ନାମ ”ନଗର ଉଦ୍ୟମ – ଷ୍ଟ୍ରିଟ୍ ଭେଣ୍ଡରରୁ ସ୍ମାର୍ଟ ଉଦ୍ୟୋଗୀ” ରଖାଯାଇଛି।
ଆଇଆଇଟି ଖଡ଼ଗପୁରର ନିର୍ଦ୍ଦେଶକ ପ୍ରଫେସର ସୁମନ ଚକ୍ରବର୍ତ୍ତୀଙ୍କ ଦ୍ବାରା ପରିକଳ୍ପିତ ଏହି ମୋବାଇଲ୍ ଇକୋସିଷ୍ଟମ୍ ସ୍ଥାୟୀ ବୈଷୟିକ ଜ୍ଞାନକୌଶଳ ମାଧ୍ୟମରେ ତୃଣମୂଳ ସ୍ତରର ଜୀବିକାକୁ ଏକ ନୂଆ ରୂପ ଦେବାକୁ ଲକ୍ଷ୍ୟ ରଖିଛି। ଏହି ଫୁଡ଼ କାର୍ଟକୁ ମୋଟର ସାଇକେଲ ପଛରେ ବାନ୍ଧି ଟାଣିବାର ସୁବିଧା ରହିଛି ।
ଏହାଦ୍ୱାରା ବ୍ୟବସାୟୀମାନେ କାମ ସରିବା ପରେ ନିଜର ସମ୍ପୂର୍ଣ୍ଣ ଦୋକାନକୁ ଘରକୁ ନେଇଯାଇପାରିବେ, ଯାହା ଫଳରେ ସାଧାରଣ ରାସ୍ତାକଡ଼ ଜାଗା ସ୍ଥାୟୀ ଭାବରେ ଅବରୋଧ ହେବ ନାହିଁ। ଗାଡ଼ିରେ ଥିବା ବିଭିନ୍ନ ଯନ୍ତ୍ରପାତି ଏବଂ ଉପକରଣଗୁଡ଼ିକୁ ସ୍ଥାୟୀ ଭାବରେ ଚଲାଇବା ପାଇଁ ଏଥିରେ ସୌର ଶକ୍ତି ସଂଯୋଗ କରାଯାଇଛି।
ଏଥିରେ ଡିଜିଟାଲ୍ ଡିସପ୍ଲେ ଲାଇଟିଂ ଏବଂ କ୍ୟାସଲେସ୍, QR-କୋଡ୍ ଆଧାରିତ ଡିଜିଟାଲ୍ ପେମେଣ୍ଟ ବ୍ୟବସ୍ଥା ସମ୍ପୂର୍ଣ୍ଣ ରୂପେ ଉପଲବ୍ଧ ଅଛି। ସହରାଞ୍ଚଳର ସ୍ୱଚ୍ଛତାକୁ ସପୋର୍ଟ କରିବା ପାଇଁ ଏହି ଗାଡ଼ିରେ ତିନି ପ୍ରକାରର ବର୍ଜ୍ୟବସ୍ତୁ ପୃଥକୀକରଣ ବ୍ୟବସ୍ଥା ରହିଛି। ଏହି ସ୍ମାର୍ଟ ଗାଡ଼ିକୁ ଆଇଆଇଟି ଖଡ଼ଗପୁରର ‘ସେତୁ କ୍ଲାଉଡ୍ କିଚେନ୍ କନେକ୍ଟ’ପ୍ଲାଟଫର୍ମ ସହିତ ଯୋଡ଼ାଯାଇଛି।
About the Author
