ଭୁବନେଶ୍ୱର (କେନ୍ୟୁଜ୍) : ଭୁବନେଶ୍ୱରରେ ଅନୁଷ୍ଠିତ ୭୩ତମ ଓଡ଼ିଶା ରାଜ୍ୟ ଭାରୋତ୍ତୋଳନ ଚାମ୍ପିଅନସିପର ଦ୍ୱିତୀୟ ଦିବସରେ ପ୍ରଥମ ଥର ଆୟୋଜିତ ୧୨ ବର୍ଷରୁ କମ୍ ଓ ୧୪ ବର୍ଷରୁ କମ୍ ବୟସ ବର୍ଗର ବାଳକ ବାଳିକା ପ୍ରତିଯୋଗିତା ଉଦଯାପିତ ହୋଇ ଯାଇଛି। ଏହି ପ୍ରତିଯୋଗିତାର ୧୨ ବର୍ଷରୁ କମ୍ ବିଭାଗରେ ମୟୂରଭଞ୍ଜ ଏବଂ ୧୪ ବର୍ଷରୁ କମ୍ ବିଭାଗରେ ଗଞ୍ଜାମ ଦଳଗତ ଚାମ୍ପିୟନ୍ ହୋଇଛନ୍ତି।
ଉଦଯାପନୀ ସମାରୋହରେ ରାଜ୍ୟ କ୍ରୀଡ଼ା ଓ ଯୁବସେବା ବିଭାଗର ନିର୍ଦ୍ଦେଶକ ଡଃ ୟେଦୁଲା ବିଜୟ ମୁଖ୍ୟ ଅତିଥି ଏବଂ ଉପସଚିବ ଧୀରଜ ପଟ୍ଟନାୟକ ସମ୍ମାନିତ ଅତିଥି ଭାବେ ଯୋଗ ଦେଇ କୃତୀ ଖେଳାଳି ଓ ଦଳଗୁଡ଼ିକୁ ପୁରସ୍କୃତ କରିଥିଲେ। ଭବିଷ୍ୟତରେ ଜାତୀୟ ଓ ଅନ୍ତର୍ଜାତୀୟ ସ୍ତରରେ ଉତ୍କୃଷ୍ଟ ପ୍ରଦର୍ଶନ କରିବା ପାଇଁ ଅତିଥିମାନେ ଯୁବ ଭାରୋତ୍ତୋଳକମାନଙ୍କୁ ଉତ୍ସାହିତ କରିଥିଲେ।
ଏହି ପ୍ରତିଯୋଗିତାରୁ ଚୟନ ହୋଇଥିବା ଖେଳାଳିମାନେ ଆସନ୍ତା ଡିସେମ୍ବର ୨୮ରୁ ଜାନୁୟାରୀ ୩ ପର୍ଯ୍ୟନ୍ତ ଉତ୍ତର ପ୍ରଦେଶର ମୋଦିନଗରଠାରେ ଅନୁଷ୍ଠିତ ହେବାକୁ ଥିବା ପ୍ରଥମ ଜାତୀୟ ପ୍ରତିଯୋଗିତାରେ ଅଂଶଗ୍ରହଣ କରିବେ।
ରାଜ୍ୟର ବିଭିନ୍ନ ଜିଲ୍ଲାରୁ ଆସିଥିବା କୁନି ଭାରୋତ୍ତୋଳକମାନେ ଏହି ପ୍ରତିଯୋଗିତାରେ ଉତ୍କୃଷ୍ଟ କ୍ରୀଡ଼ା ନୈପୁଣ୍ୟ ପ୍ରଦର୍ଶନ କରିଛନ୍ତି। ତୃଣମୂଳ ସ୍ତରରୁ ଭାରୋତ୍ତୋଳନ କ୍ରୀଡ଼ାର ବିକାଶ ଏବଂ ନୂତନ ପ୍ରତିଭା ଚିହ୍ନଟ କରିବା ଦିଗରେ ଏହି ଆୟୋଜନ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ଓଡ଼ିଶା ଭାରୋତ୍ତୋଳନ ସଂଘ ପକ୍ଷରୁ କୁହାଯିବା ସହ ସମସ୍ତ କୃତୀ ଖେଳାଳି ଓ ପ୍ରଶିକ୍ଷକଙ୍କୁ ଶୁଭେଚ୍ଛା ଜଣାଯାଇଛି।
