ଭୁବନେଶ୍ୱର:
ଭୁବନେଶ୍ୱର ପାଇଁ ଏକ ଗର୍ବର ମୁହୂର୍ତ୍ତ । ଭୁବନେଶ୍ୱରର ଦୁଇଜଣ ପ୍ରଖ୍ୟାତ ବୈଜ୍ଞାନିକଙ୍କୁ ଭାରତୀୟ ରସାୟନ ଓ ଜୀବବିଜ୍ଞାନୀ ସମିତି (Indian Society of Chemists and Biologists–ISCB) ର ଗୁରୁତ୍ୱପୂର୍ଣ୍ଣ ଜାତୀୟ ସଂସ୍ଥାଗତ ଦାୟିତ୍ୱରେ ନିଯୁକ୍ତ କରାଯାଇଛି । ଏହା ତାଙ୍କର ଶିକ୍ଷା, ଗବେଷଣା ଓ ବୈଜ୍ଞାନିକ ଅବଦାନ ପ୍ରତି ଏକ ମହତ୍ତ୍ୱପୂର୍ଣ୍ଣ ସ୍ୱୀକୃତି ଭାବେ ଦେଖାଯାଉଛି ।
ଇଣ୍ଡିଆନ୍ ଓଇଲ୍ ଓଡିଶା କ୍ୟାମ୍ପସ୍ସ୍ଥିତ ଇନ୍ଷ୍ଟିଟ୍ୟୁଟ୍ ଅଫ୍ କେମିକାଲ୍ ଟେକ୍ନୋଲୋଜିର ସହାୟକ ପ୍ରାଧ୍ୟାପକ ଡ଼. ସ୍ୱାଗତ କୁମାର ମହାପାତ୍ରଙ୍କୁ ISCB ର ଜାତୀୟ କାର୍ଯ୍ୟକାରିଣୀ ପରିଷଦର ସଦସ୍ୟ ଭାବେ ନିଯୁକ୍ତ କରାଯାଇଛି । ରସାୟନ ବିଜ୍ଞାନ କ୍ଷେତ୍ରରେ ତାଙ୍କର ଦୀର୍ଘବର୍ଷୀୟ ଅବଦାନ, ଗବେଷଣା ନବୋନ୍ମେଷ ଓ ଜାତୀୟ ସ୍ତରରେ ଶିକ୍ଷାତ୍ମକ ନେତୃତ୍ୱ ଏହି ନିଯୁକ୍ତିର ପ୍ରମୁଖ କାରଣ ରହିଛି ।
ସେହିପରି, KIIT ଡିମ୍ଡ ଟୁ ବି ୟୁନିଭର୍ସିଟିର ସହଯୋଗୀ ପ୍ରାଧ୍ୟାପକା ଡ଼. ଚନ୍ଦନା ମହାନ୍ତିଙ୍କୁ ISCB ର ଜାତୀୟ ମହିଳା ମଞ୍ଚର ସଦସ୍ୟ ଭାବେ ନିଯୁକ୍ତ କରାଯାଇଛି । ଏହି ମଞ୍ଚ ରସାୟନ ଓ ଜୀବବିଜ୍ଞାନ କ୍ଷେତ୍ରରେ ମହିଳା ବୈଜ୍ଞାନିକମାନଙ୍କର ଅଂଶଗ୍ରହଣ, ନେତୃତ୍ୱ ଓ ସାର୍ବଜନୀନ ଦୃଶ୍ୟମାନତା ବୃଦ୍ଧି ପାଇଁ କାର୍ଯ୍ୟ କରିଥାଏ ।
ଏହି ଦୁଇଟି ନିଯୁକ୍ତି ISCB ର ପକ୍ଷରୁ ରସାୟନ ଓ ଜୀବବିଜ୍ଞାନ କ୍ଷେତ୍ରରେ ଗୁଣାତ୍ମକ ଗବେଷଣା, ଶିକ୍ଷଣ ଓ ଜାତୀୟ ସ୍ତରର ସକ୍ରିୟ ସହଭାଗୀତାକୁ ସ୍ୱୀକୃତି ଦେବାର ପ୍ରତିବଦ୍ଧତାକୁ ପ୍ରତିବିମ୍ବିତ କରେ ।
ଡ଼. ସ୍ୱାଗତ ମହାପାତ୍ର ଓ ଡ଼. ଚନ୍ଦନା ମହାନ୍ତିଙ୍କୁ ତାଙ୍କର ଏହି ଗରିମାମୟ ସଫଳତା ପାଇଁ ବିଭିନ୍ନ ମହଳରୁ ଉଷ୍ମ ଅଭିନନ୍ଦନ ଜଣାଯାଇଛି । ସେହିସହ, ଏହି ନିଯୁକ୍ତି ପାଇଁ ଆସ୍ଥା ଓ ଆତ୍ମବିଶ୍ୱାସ ପ୍ରକାଶ କରିଥିବା ପ୍ରଫେସର ଅନାମିକ୍ ଶାହ ଓ ପ୍ରଫେସର ପି. ଏମ୍. ଏସ୍. ଚୌହାନଙ୍କ ପ୍ରତି ମଧ୍ୟ କୃତଜ୍ଞତା ଜଣାଯାଇଛି ।
About the Author
